Champhai district bawrhsap James Lalrinchhana leh Champhai District All NGO Committee hruaitute chu Thawhlehni khan inkawmin, district tana hmalakna tur pawimawh hrang hrang an sawi ho.
Bawrhsap chuan sawkar hnathawk leh NGO-te chu mipui rawngbawl tur leh an hmakhua ngaia theihtawp chhuah tur an ni tih sawiin, mipui aiawh an nihna inhre chungin ram leh hnam tana tanrual thiam a pawimawh tih a sawi. Dan hnuaiah theihtawp chhuaha hma lak ho thin a pawimawh thu leh infinchhuah tlan zel a tul thu a sawi a. Thenawm ram buai avanga an la inpeih lo chungin, ramri kaltlanga sumdawnna dan ang taka kalpui a nih theihna’n sawrkarin theihtawp a chhuah thu leh, hmunhma cheibawl mek a nih thu a sawi a ni.
Thutkhawmah hian Keilungliah tuikhuah enkawl leh venhim chungchang pawh sawi niin, Keilungliah tuikhuah fai leh thianghlim siam turin a chawmtu hnar zawng zawngte uluk lehzuala enkawl a, hnawm paih lo tura inzirtir a tul thu sawi a ni. Champhai khawpui chawmtu Khawchhaktuipui hnar humhalh leh tuihna tlem zel ven kawnga hmalak tulte sawihoin, uluk zawkin mithiamte rawn chunga zirchian nise an ti. Heng bakah hian Road Safety Committee, ruihhlo do kawnga hmalakna hrang hrang, Consumer Forum tih chak, traffic management leh Swadhar Greh chungchanga hmalaknate sawi a ni bawk.
NGO lam atangin an hmalaknate sawi a ni a. District hmasawnna tura pawimawh leh vei zawng hrang hrangte inpawhtlang taka sawiho niin, March thla chhungin Khawchhaktuipui hnar leh a chhehvel thianfaia hnatlangpui neih nise an ti.