Nilai zan khan UEFA Champions League (UCL) last 16 play-off khelh chhunzawm a ni a. German club lian Bayern Munich chuan Celtic mualah hnehna an chang. Bayern an chak lai hian team lian zinga mi AC Milan chu mikhual an nihna hmunah an tlawm ve thung lawi.
Bayern Munich hi Scottish club lian Celtic hmachhawn turin Celtic Park-ah an leng lut a. An len luhna mualah 2-1 in hnehna an chang. Mimualah hnehna an chang hmasa a, an muala inkhel hmachhawn zui leh tur an nih vangin Bayern hian last 16 an hnaih leh zual sauh.
German club lian Bayern tan hian Michael Olise chuan minute 45-naah hmahruaina goal a thun a, si khat faia hmahruai chungin chawlhlawk an hmang. Chawlhlawk hnu lamah Bayern an khel tha chhunzawm a, goal an thun belh thuai. Second half tan atanga minute lina lekah Harry Kane chuan an goal hnihna a thun a, an hmahruaina a tizau.
An mualah si hnih an phurh hnuin Celtic in goal thun ngei tumin tan an khawh a, goal khat an thun. Daizen Maeda chuan minute 79-naah goal thunin an si phurh a sut then a. An mualah tlawm pumpelh tum zui viau mah se an hlawhtling zo tawh lova, Bayern Munich lakah uiawm takin an tlawm zui ta a ni. Celtic hian last 16 lut thei tur chuan Bayern Munich mual Allianz Arena-ah inlehthalna lian an thlentir a ngai tawh dawn.
Nilai zana inkhel dangah Italian club lian AC Milan chu mikhual an nihna hmunah an tlawm a. Si khat faiin mualneitu Feyenoord Rotterdam an hneh lo.
Bayern an chak
