Baptist Church of Mizoram rorelna sang, Assembly Executive Committee chu Ningani khan an thukhawm a. BCM president Rev KV Thanga’n kaihruaiin, general secretary Rev R Lalbiakliana’n department hrang hrang report a khaikhawm. Committee member 345 atangin 293 an tel.
General secretary report-a tarlan danin, Assembly 2023 thu angin Baptist Camping Centre Serkawna buatsaih chu hman theiha hawn a ni tawh a; Baptist Centre Aizawl building sakna tur lungphum phum a ni a; Champhai ABC thar hawn a ni. 2023 April – August chhungin kohhran thar pathum an din a ni bawk.
Mission rawngbawlna lamah Sikkim Mission Field thar hawn a ni a; Mashihi Baptist Church hawn a ni a; kumin January – June thlengin Mission Field hrang hrangah ring thar 2185 neiin, kohhran thar 4 leh Fellowship 4 din belh a ni.
Meeting thurel zingah – BCM-in thawktute tana dan (rules) a siam tih danglam rawtna hrang hrang ngaihtuahin, chu’ng zingah chuan president charge allowance tih bo rawtna, thawktute extra duty leave tih bo rawtna, fixed pay worker-te dinhmun siam danglam rawtna te a tel. Pay Commission din rawtna chu pawmin, AICS dean ruat thar pawmpui a ni bawk.
BCM Assembly thukhawm
