Kum 2023-2024 a Baptist Church of Mizoram budget atan cheng nuai 12612.87 pawm a ni.
BCM Assembly hnuaia rorelna sang ber, Assembly Executive Committee meeting ni hnih awh neih zawh takah
Finance & Pension Committee-in 2023-2024 BCM budget a ruahman chu pharh a ni a. Budget pumpuiah cheng nuai 12612.87 a ni a, kum hmasa 2022- 2023 budget aia a sanna chu za zelah 6.95 a ni. Kohhran thawhlawm atanga hmuh tura ruahman chu cheng nuai 8254.04 niin, Department thawhchhuah tura beisei zat chu nuai 4358.83 a ni.
Pastoral department atanga pastor atana lak thar mi 9 pawmpuiin, pro.pastor 5, probation period hmang zo te Assembly 2023-a ordain turin thlantlin an ni a, 2023 March 12 BCM Assembly-ah nemngheh an ni ang.
Department hrang hrang tan post thar hawn dilna, hnaruak hnawhkhah dilna, contract-a thawk mek mi 53 tihngheh tura thlente chu pawmin, Aizawl East ABC atanga Champhai ABC siam belh rawtna leh Sikkim Mission Field hawn tura ruahmanna chu pawmin, hengte hi Assembly-a thlen remtih a ni.
Meeting hi BCM president Rev Dr R. Zolawma’n a kaihruai a, general secretary report-a tarlan zingah – Zokhawtharah raltlante pualin Baptist Kohhran din a ni a; Chin Baptist Association of North America chuan Zokhawthar BCM biak in sak tanpui nan Rs. 3,95,823/- (US dollar 5000) an an rawn thawn a, BCM leh Champhai Grape Growers’ Society-te MoU pawhsei a ni a, e-Service software buatsaih mek chu zawh thawhkhat a ni tawh. BCM thurin chhuizauna, commentary revision buatsaih turin Committee din a ni a, thui tak kalpui a nih tawh thu te, Council of Churches in Mizoram’ dinna tur chungchang bawhzui zel a nih thu leh, 2023 January 24 hian BCM, Presbyterian, ECM, Salvation Army leh LIKBK atanga aiawh 6 theuh inhmuhkhawmna neih tum a nih thu te a tel a ni.
Myanmar leh Bangaladesh raltlante tlawhin, an pualin BCM chuan tanpuina a pe a; BCM Charity Fund atangin Krismas pualin home hrang hrang leh hospital-ah te tanpuina Rs. 3,90000 semchhuakin, missionary thawklai boral ta te, thlatin pension (monthly pension) lak tur neilo chhungkua 3 hnenah tanpuina cheng nuai 4.5 pek a ni.
Hetihlai hian BCM Charity Fund puala Krismas programme headquarters, Aizawl Area leh Lawngtlai Area-ah te neih a ni a, heng atanga sum tlingkhawm Rs. 14,24,515 hmuh a ni.
Assembly Executive Committee-ah hian Pastor bial aiawh, ABC aiawh leh Department hrang hrang aiawhte, BCM Puipate telin, Committee member 280 an tel.