Site icon The Aizawl Post

BCM budget nuai 12642.87 pawm Kohhran tawngkam inang siam rel

Baptist Church of Mizoram chuan 2023- 2024 budget atan cheng nuai 12642.87 a pawm a. Kohhranin tawngkam hman dan phung bik neih theih nan inangtlanga hman tur a bua siam an rel.
Mizoram Baptist Kohhran Rorelna sang ber – Assembly vawi 127-na chu March 8 zan atanga tanin March 12, Pathianni zan thleng khan neih a ni a. Ni thum chhung rorel niin, rorel palai hi 1348 an ni a, BCM Assembly Rorel palai kal tam ber kum nia chhinchhiah a ni.
Thurel zingah – pandal structure nei tura hmalak rawtna, Baptist danglamna a lehkhabua siama sem chhuah, Bible commentary Mizo tawnga siam rawtna, Baptist (BCM) Kohhran tawngkam hman dan phung leh ziak dan phung bik (Baptist House Styles) inang tlang a bua siam rawtna, medical officer post ruak 2 hnawh khah dilna, BCM department hrang hrang tana post thar 32 hawn dilna leh hnaruak hnawhkhah dilna 3, thawktu (contract) mi 53 a ngheta hlankaite chu pawm zingah an tel. ABC hrang hrang atanga ram pum huap tawngtai neih tura thu lut chu khaikhawmin pawm a ni bawk.
2023-2024 budget pumpuiah cheng nuai 12642.87 pawm a ni a. Kum hmasa aia budget punna chu nuai 851.84 a ni a, budget punna hi za zelah 7.22 a ni. Kohhran thawhlawm punna chu zaa 4.62 a ni.
Pathianni chawhmaah Pastor nemngheh inkhawm neih a ni a. President Rev KV Thanga’n kaihruaiin, Pastor atana lak, an probation hun hmang zoa paltlang tawh mi 5 nemngheh an ni. Chawhnuah Lalpa Zanriah Sakramen inkhawm neiin, zan inkhawmah president kalchhuak RevDr R Zolawma’n thuchah a sawi a ni.
Assembly Rorel ni hmasa ber, Ningani khan president RevDr R Zolawma’n president thar Rev KV Thanga hnenah charge hlanin, president thar hian Assembly Rorel a kaihruai nghal a. Kum 2023- 2024 president elect atan Rev F Ramdinmawia thlan a ni.

Exit mobile version