Sawrkar hna leh hna dang laka ‘ ruling party list’ awm thin chu BJP a sawrkar chuan a awm dawn loa, hna dil lama beidawng tawhte pawhin an thiamna hmangin zalen takin hna an hmu thei tawh dawn tih an party state president Vanlalhmuaka chuan a sawi.
Zirtawpnia BJP State office-a inkhawmah Vanlalhmuaka chuan sawrkar tawhten hna lak leh thildanga an party mi list an siam thin ang chu BJP a sawrkar chuan a nei ve dawn loa, a thiam leh tling te lak an ni dawn tih a sawi. “Hna lak tura sum leh paia inthamna awm thin leh corruption hi kan hnungkhirh dawn. Chumi kan tih hunah chuan sawrkar hnaah emaw hna dang lakah pawh thalai, sawrkar hna pawh dil tha duh tawh lo leh beidawng tam tak ten an thiamna hmanga hna an hmuh theihna’n zalen takin an bei thei dawn a ni,” a ti.
BJP a sawrkar chuan a mamawhtute hnena an mamawh thlensak an ngaihpawimawh dawn a. A bikin education, health infrastructure, power intodelh leh inkalpawhna kawng tha chu an ngaihpawimawh tur a ni a, heng rual hian a dang mamawh chu a lo kal tel mai dawn, tiin BJP Mizoram State president hian a sawi.
Zirna in chungchanga harsatna, sawrkar sikul hrang hrang chu primary atanga siamtha in, tunhmaa primary sikul-a zirtirtu tha kan neih ang khan a bulthut atangin an siamtha anga, zirtirtu pawh sikul zawng zawngah an dah vek dawn tih a sawi. “English medium-a sum tam tak senga harsa tak chunga kan fate luh tir ngai tawh loin, sawrkar sikulah zirna tha, thiamna nei turin kan pe dawn,” a ti.
Health lamah pawh a bulthut atanga tanin, Sub Health Centre thuamtha a, nu in nau an neihna tlaka siamtha in, chu chuan nasa takin miretheite ah awlsamna a siam dawn tih BJP hruaitu hian a sawi. “Khawtinah health infrastructure tha kan siam dawn a, chutiang tih theihna chu party dangten an nei ve thei loa, BJP chauh kan sawrkarin kan ti thei dawn a ni,” a ti.
Beidawng tawhte tan kawng sial tum
