Daily Newspaper

Beijing envoy atan Pradeep Kumar Rawat

11

Ministry of External Affairs chuan Mandarin tawng thiam career diplomat Pradeep Kumar Rawat chu Beijing-a envoy atan ruat a nih thu a puang.

Netherland-a ambassador-a awm mek Rawat hian kumina a term kum thum hmang zo tawh Vikram Misri a thlak dawn a ni.

India envoy thar hian kum 1980 hnua ram pahnih tena inlaichinna pangngai an neih hnua an inkar a chhiat lai berin envoy hna a thawk dawn a. Ram pahnihte chu Line of Actual Control-ah April 2020-a Chinese military te an huangtau zual atangin boruak tang tak an nei dun reng a ni.

Rawat hi ramri buai vela mithar a ni lo thung a, kum 2014 atanga 2017 inkar khan Ministry of External Affairs-ah Joint Secretary (East Asia) nihna chelhin China policy enkawltu ber niin New Delhi-ah a lo awm tawh bawk.

Kum 1990 khan foreign service zawmin Rawat hian foreign language thlan turah mandarin thlangin Hong Kong-ah a awm hmasa ber a, chumi hnuah Beijing kum 1992 atanga 1997 chhung khan a awm leh zui a ni. Hemi hnu pawh hian China kaihhnawih lam khawih rengin kum thum chhung East Asia Division a enkawl leh a ni.

Rawat hi kum 2003 khan Beijing ah a term hnihna kum li chhung awm turin Beijing-ah dah leh a ni a, Deputy Chief of Mission anga awmin a awm hun lai hian ramri chungchangah kum 2003 khan Special Representatives ruat leh kum 2005-a political parameters leh guiding principle-a inremna siamnaah a sulsutu ber a ni bawk.

Khata tang khan ramri chungchanga inbiakna lamah hmasawnna a awm zui lo va, tun hmaa boundary-a ram pahnih tena inhriatthiam tawnna an neihte pawh thla 18 chhung border crisis awm tawhin harsatna a thlen nasa zual zel zawk a ni.

Misri pawhin December 6 khan New Delhi a let hmain Chinese Foreign Minister Wang Yi a bia a. Ram pahnih inlaichinnaah harsatna leh beiseina a awm ve ve chungin nikuma harsatna thleng khan inlaichinnaa hmasawnna awm thei turte nasa takin a hliahkhuh a. Political, diplomatic leh military lamah ram pahnih tena harsatna neih te chinfel a nih theih nan hmalakna awmzui zel se an ti, tiin Indian Embassy thuchhuak chuan a tarlang.

Chinese Foreign Minister chuan ram pahnih inlaichinnaah ‘tih tur pathum leh tihloh tur pathum’ a sawi tiin China Foreign Ministry thuchhuak chuan a tarlang a. Mahse, ram pahnihte hian ngaihdan inang lo neiin China chuan ramri buaina atanga inthiarchhuah chungchangah a che rang duh lo va, ramri hnaihah infrastructure a din belh zel bawk a. India chuan ram pahnihte inlaichinna a ngai anga a awm leh dawn chuan status quo tundin leh a ngiat thung a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy