Daily Newspaper

Beirut khawpuiah politian te bang tura nawrna nasa

35

Beirut khawpuia sorkar ministry te chu lungawilo ten luahion an hal bawk a, karkalta tir lama Beirut khawpuia thil puak avanga thinrimna nasa tak vangin an tawng a ni.

Hetihlai hian Lebanon Prime Minister Hassan Diab chuan ram mipuite hnenah thusawina neiin an kal tum zel dan sawiin inthlanna rang taka neih an duh thu a sawi a; an ram chhunga political party hrang hrangte nena inremna a awm theih nan thla hnih a la mamawh thu a sawi.

Mahse, lungawilote chuan an politician-te chu kum tam hman tawh system hlui hmanga inthlan an huaihawt an duh lo va, chu system hlui chu kum ruk chuang lawng chawlhna hmuna thil puak thei dah reng remtih theihna chhanah an ngai a ni.

Beirut khawpui kawtthlera au hla ber chu politician te bang tur leh Lebanon a rorelna thar a awm theih nana insaseng tura tihna a ni.

Banner pakhatah chuan ‘Ban nge Khaihlum’ tih an ziak kuau a, hei hian politician te chu inremna zawng lova bang tura tihna a kawk chiang kher mai.
“Heng dan hnuaia nun hi mipui ten an duh tawh lo” tiin Hussein El Achi, Min Tishreen activist group punkhawmna huaihawttu zinga tel chuan a sawi a.
Tuna lungawilohna lantirna hi nikum October thlaa punkhawmna nen khan a dang daih a, nikumah kha chuan Lebanon a sectarian system of governance reform duhna a ni.

“A tirah chuan kan ngen a, duh kan nei a. Tunah chuan kan ngen tawh dawn lo, chet kan la tawh dawn a, kan chanpual kan nei let leh ang,” tiin a sawi bawk.

Beirut khawpuia punkhawmna boruak hi a thim hle a sawi niin thinrimna chuan Lebanon political faction te a kawk bik a, chung zingah chuan thilti thei tak Shiite militia Hezbollah te, ammonium nitrate puak ta 2,750 metric tons dahkhawmna thunun tute pawh a huam tel bawk.

Lungawilo pung khawm te hian Lebanon politician lawk te chu an dem vek a, chung zingah chuan hezbollah leader Hassan Nasrallah pawh a tel a.

Narallah hian kar kalta Zirtawp khan thusaiwna a neihahah mipui te chu thil puakah mawhphurtu leh demah Shiite militia te chu hmer tel lo tura vau thungin ‘indona in tan chuan’ Hezbollah a chak ang tiin a sawi thung a.

Hetih lai hian lungawilo pungkhawmte chuan politician te chu bang vek tura duh thungin Hezbollah hmer tel vekin a hniam ber atanga sang ber te chu bang vek turin an ngiat thung a. “Kan politicians te hi kan hua a, an vaiin kan hua” tiin an sawi bawk.

Lebanon Foreign Ministry building kar kalta Thawhlehnia thil puakin a tihchhiat nasat rauhsan chu lungawilo te hian an luah zui nghal a, banner an tar zui nghal a. Hei bakah hian Economy leh environment ministry building pawh an luah bawk.

Lungawi lote pun khawm veleh hian sipai leh police te chuan tear gas hmangin an bei zui a, lungawilo ten brick in an vawm let a, thisen chhuahna nasa tak a thlen zui phah a ni.

Lungawilote nena inbeihna avang hian mi 65 chuang damdawi In panpui an ni a, a hmunah mi 188 chuang enkawl zui nghal an ni bawk a. Lebanon sipai nunna chan an awm bawk.

Mahse, a rei tial tiala security forces ten thunun tial tialin a hnu lawkah Foreign Ministry pawh an la let zui thei ta a ni.

Lungawilote chuan Beirut khawpuia bomb puak chu an beiseina tawp tak meuh zawk a nih thu sawiin he thil puakin Lebanon politics a sawi danglam lo a nih chuan beisei an neih tawh loh thu an sawi thung.

THE AIZAWL POST
~Rampawn~

HOME>> The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy