Beisei angin thawk thei ila sang takin kan awm ka ring – Chief minister

Tun kum 5 chhungin an beisei angin thawk thei se, sang takin an awm a ring tih chief minister Zoramthanga chuan a sawi.
Mizoram Finance & Account Service Association general conference vawi 28-na a hmanpuinaah chief minister chuan tunhmaa central-in khauh angreng taka state sawrkar sum hman dan tur a duansak kha a thlahdul deuh a, state-te anmahni remhriatnaa hmasawnna kalpui thei tura min tih zalen hlek laiin, Covid19 a lo thleng zui ta si a, hnathawhna sum central-in a pek tur tam tak an hmu thei lo zui ta tih a sawi. “Chutiang harsatna chuan min chim avangin kan beisei ang takin hna kan thawk thei loa, thawk thei ni ila chu tun kum 5 chhung hian Mizoram hi sang takah kan awm ka ring,” a ti.
“Pathian zarah hun tha kan nei a nih ngai chuan kan rama resource awm ang ang haichhuak tam lehzualin, kan ram hi nasa taka chawikan theih a ni tih kan hmuchiang a. Pathianin engkim that duhna ram min pe a, ram ralmuang leh lehkhathiam tamna ramah min siam a, kan economy lam la tha tawk lo hi kan hmabak pawimawh a ni,” tiin, thei leh thlai lam tharchhuah tam a ngai a, transportation system tha kan mamawh a, a lo sawngbawlna tur processing system tha kan mamawh, tiin Zoramthanga hian a sawi bawk.
Thil thar hralhna a awm a ngaih bakah kan tharchhuahten reilote chhunga India ram khawpui lian a thlen theih nan Lengpui Airport pawh thuamthat zel a ni tih chief minister hian a sawi. “Heng hmasawnna tura hmabak kan neih hi chonaah ngaiin finance lama kan mithiamten mahni zawnah theihtawp chhuah zel ang u. Ramdangten an tih theih hi kan tih theih loh chhan tur a awm loa, rilru hmunkhat pua mahni zawnah theuh hma la turin kan zavaia koh kan ni,” a ti.