Daily Newspaper

Beiseiawm Oxford Vaccine trial titawp lailawk

30

AstraZeneca leh Oxford Univerity tena coronavirus vaccine an siam final clinical trial chu volunteer pakhatin ngeih lova a damloh avangin chawlhsan lailawk a ni.

AstraZeneca te chuan ‘beisei loh damlohna’ a awm avangin ‘routine’ pause an nei tiin an sawi a ni.

He vaccine siam mek hi beiseiawm ber zinga ngaih niin khawvelin a ngaihven em em a ni bawk a.

Hralh chhuah mai theih tura vaccine siam hmasak ber ni dawna ngaih niin beiseina a sang hle a, phase 1 leh 2 hlawhtling taka kalpui a lo ni tawh a ni.

Tun hnaiah Phase 3 testing tih niin participants 30,000 lai US mai bakah UK, Brazil leh South Africa mi te an tel a. Phase 3 trial ah hian mi sang tam tak tel thinin a kuma kum a daih thin a ni.

Developer ten eng nge an sawi?
International trial site te chu tihtawp lailawk niin independencet investigation neih zui a ni a, chumi hnuah chauh trial chu neih chhunzawm theih a ni ang.

“Trial lian tham taka neihah chuan damlohna thleng thei a ni a, mahse chu chu independent a fimkhur taka enfiah tur a ni,” tiin Oxford University thupuangtu chuan a sawi.

Tun hi Oxford coronavirus vaccine trial tihtawp lailawk tum hnihna a ni tawh a. Heng ang hi chu major trial neihnaah chuan a thleng fo thina ngaih niin volunteer te chu an damloha damdawi Ina dah an ngaih chuan leh, an damloh chhan hriat a nih loh chuan trial tihtawp nghal a ni thin.

Vaccine siam tumna?
US President Donald Trump chuan 3 November a US election hma ngeiin vaccine neih hman a duh thu a sawi a, mahse, he a thu sawi hian vaccine himna aiin politics ngaih pawimawh a nih hlauhna a ti lian hle thung.

Thawhlehni khan Covid-19 vaccine developer pakua te chuan mipui tena ngaihthatna an neih theih nan vaccine siamna kawngah scientific leh ethical standard tha thei ang bera an kalpui tur thu sawiin ‘thutiam’ an siam nghe nghe a ni.

He thutiam siamnaah hian AstraZeneca te pawh hi telin vaccine in clinical trial phase III a paltlang ngei tur a ni a, chumi hnuah thuneitu ten an pawm chauh ang.

Hming ziah hnantu zingah Industry giants Johnson & Johnson, Bion Tech, Glaxo SmithKline, Pfizer, Merk, Moderna, Sanofi leh Novavax te pawh an tel a. Mihringa vaccine pek a nih hmain a him ngei a ni tih finfiah dap phawt an tum thu an sawi.

World Health Organization (WHO) chuan khawvel pumah vaccine 180 vel siam mek a nih thu sawiin mahse tumahin clinical trial an la paltlang lo vek thung.

World Health Organization chuan kumin hi chuan a him chiang a ni tih finfiah theih vaccine siam hman a nih an rin loh thu sawiin a chhan chu a him ngei tih finfiah nana hun a duh rei thin vang a nih thu an sawi.

Tichung chuan China leh Russia te chuan an vaccine siam te chu hnathawktute hnenah an pe tawh thung a, heng vaccine an siam te hi WHO chuan clinical trial kalpui mek zinga chhiar an ni thung.

(THE AIZAWL POST – Rampawn)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy