Daily Newspaper

Belarus-ah lungawi lohna nasa zawkin chhunzawm zel

14

Mi sing tam takte chu Belarus khawpui Minsk kawtthlerah pung khawmin President Alexander Lukashenko duh lohna lantirin police pawh hlau lovin chet an la.

Police thahnem takte chu hmun thenkhat Independence Square te chu an luah phal lovin an dang chat thung a, mi 140 chuang man an ni tawh nia sawi a ni bawk.

Lungawi lo pung khawmte hi police te nena inep rengin President Alexander Lukashenko chu bang turin an nawr a ni.

Belarus hi kumin August 9-a inthlan result tihchhuah atangin buaiin a la bawh char char a, kha inthlanna an neih kha tihchingpenah a tam ber ten an ngai a ni.

Lukashenko hi kum 26 thuneihna thut tawh niin inthlanah felfai lo engmah a awm lo tiin thuneihna la chan chhun zawm zel a tum thung.

Minsk khawpuia kawngzawhna neiha mipui pungkhawm hi an tam tial tial nia sawi a ni a. Lukashenko sawiselna leh diriamnain hmun a luah thuk hle bawk.

Lungawi lohna lantirna hmun ber mipui tam ber tena an thlen mai theih loh nan police-te chuan kawngpui tam tak an dangchat bawk a.

Lungawi lo thahnem takte chuan Lukashenko chenna Independence Palace panin kawng an zawh a, mahse police tam tham tak ten water cannon vehicle nen an venghim thung.

Belarus sorkar chuan mipui lungawi lohna lantir report-tu journalist-te chungah pawh kutthlak zui zelin journalist 17-te accreditation a tihtawp sak tawh bawk a. Journalist accreditation a hnawlsak duh lovin Germany-a Belarus ambassador chu thu zawhfiah turin a ko zui nghal bawk.

Hetihlai hian Lukashenko press secretary chuan Russian media outlet RIA Novosti hnenah Lukashenko-an Independence Palace chhunga machine gun kenga thla a lak chu a thawn a.

Pathianni pawh khan flak jacket ha chung leh assault rifle keng chunga a thlalak phochhuah a ni bawk a.

Russian President Vladimir Putin chuan Lukashoneko hi be fo in Moscow tlawh turin a sawm nia sawi a ni bawk a. Putin chuan police reserve te chu a tul thuta Belarus a lut thei tura inralring turin a hrilh bawk.

Belarus buaina
Belarus buaina hi August thla tir lama inthlanna nasa taka tihchingpena puha Lukashenko tlin lehna avanga thleng niin Lukasheno hian kum 1994 atang khan Belarus-ah rorelna a chelh tawh a ni.

Opposition candidate Svetlana Tikhanovskya chu vote thlak zawh niin man niin a hnuah Lithuania ah a tlanchhe zui a, heta tang hian lungawi lohna lantir turin mipuite a ngen a ni.

Belarus-ah tun anga lungawi lohna lantirna nasa hi a la awm lo va, sorkar hnathawk rualte pawhin an zawm tho bawk a. Mi sang tam tak man tawh niin police in an nghaisa nasa bawk.

Belarus inthlan chu European Union leh US ten an hnawl ve ve thu an sawi tawh a, inthlanna fel leh dik a ni lo an ti. EU chuan he inthlana vote tichingpentua puhte chu hrek tumin hma a la mek bawk.

(THE AIZAWL POST – Rampawn)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy