Chelsea goalkeeper ropui ni Thin Petr Cech kha kan la hria ang a, football manbehna kutkawr a phelh hnuah ice hockey lam a luhchilh thu pawh tarlan a ni tawh a, tunah hian ice hockey league inkhaidiat dana a sangber Elite League hnuai chiah National Ice Hockey League-ah Oxford City Stars tana khel mekin, chuta Tang chuan Elite League lama insawn turin Belfast Giants chuan loan-in an lalut.
Kumin April thla pawh khan Belfast khawpuia charity game-ah kum 41 mi hi Belfast Giants tan a lo khel tawh a, league sang-berah loan hmangin inelna a hmachhawnpui zui dawn ta a ni.
Belfast Giants coach Adam Keefe chuan an chhawr thar tur chungchang sawiin, “Petr hi infiammi hriat hlawh leh hlawh-tling niin, level sangbera khaw-sak dan thiam mi a ni.
“Chutiang mi kan rawih theihna tura min puihna avangin Oxford City Stars leh amah, Petr chungah kan lawm a, he loan chhunga min thlawpna hi kan chhawr hle dawn a ni,” a ti.
April thlaa SSE Arena-a Giants tana Petr Cech inlanna charity game-ah khan Ukrai-nian club Dnipro Kherson an hmachhawn a, khami aTanga an sum hmuh tlingkhawm £65,000 chuang kha indonain a tihbuai Ukraine rama ice hockey a kal chhunzawm zel theihna’n hlan a ni.
Giants thuam inbel chunga charity mai ni lo competitive game khel tawh tawh Czech star hian kum 2004 aTanga 2015 chhung khan Chelsea tan game 330 aia tam khel tlingin, Stamford Bridge club a zawm hma khan London khaw team dang Arsenal-ah kum li a khawsa hman bawk.
Kum 2019-a professional football a chawlhsan khan Premier League title pali, FA Cup panga leh League Cup pathum bakah Champions League leh Europa League title pakhat ve ve a la tling.
Cech hian ram tan pawh match 124 khel tlingin, Czech Republic tan 2006 World Cup a khelh bakah kum 2008 leh 2012 khan Euro a khel bawk.
Kum 2019-a a football ca-reer a zialfel hnu khan Guildford Phoenix tana ice hockey khelin, Chelmsford Chieftains lama a insawn hnuah tuna a team vawn lai Oxford City Stars a pan a, loan-in Northern Ireland lam a pan zui leh ta a ni.
Belfast Giants tana khel tur Cech
