Benfica lakah Real chak nawn leh
Lisbon khawpuia Champions League knockout round play-off first leg-ah Vinicius Junior goal khat chhuihluh hmangin an chak tawh a, Nilaini zan second leg-ah 2-1 hnehna chang lehin, 3-1 aggregate nen Real Madrid-in last 16 an lut ve leh ta nge nge e.
Tarlan tawh thin angin, record siama European champion tum 15 ni thei awmchhun Spanish giants hi league phase table-ah automatic-a knock out round luh phakna chin top eight luah pha loin, play-off kaltlanga kawng dang an zawn a ngai a, Portuguese club lian ngam chungin a thiam zual 16 zingah an inhlangkai ta tho a ni.
First leg-ah khan Brazilian mihang Vinicius chuan second half-ah mikhual chakna goal awmchhun khungin, Benfica player Gianluca Prestianni lak atangin a vun rawng avanga hmuhsitna a tawng leh a; he Argentine midfielder hi a chungchang chhui mek a nih laiin match khat hremna lo pek lailawk phawt a ni a, Santiago Bernabeu-ah khelmual a lut ve thei ta lo.
Second leg-ah hian chak mamawh Benfica lamin goal an khung hmasa a; tan atanga minute 14-na lekah Raul Asencio chuan ball hlauhawm thei thenfai a tumna lamah an goal lam hawiin a thawnlut palh a, Real keeper Thibaut Courtois chuan lo dang thei hram mah se ball tlahlang atangin Rafa Silva chuan mikhual hmahruaina goal a thun zui ta mai a ni!
Benfica hmahruaina hian a daih rei ta chuang lo a, minute hnih a kal leh tihah Aurelien Tchouameni chuan box tlang hriam lai atanga chhuihlutin Madrid si phurh a sut a, kha kha a Champions League goal hmasaber a ni zui ta nghe nghe.
Hei bak hi first half-ah goal dang a luh belh lo a; second half tawp hma minute 10 la awmah Vinicius Jr chuan a chetthat chhunzawmin chiang lehzual zawka La Liga club-in last 16 an luhna goal a thawh leh.
He goal siamchhuaktu pawh hi Tchouameni goal tur chhawpsaktu Uruguay central midfielder Federico Santiago Valverde leh bawk a ni.
Vinicius hian a game hnuhnung panga atangin goal ruk a thun tling ta a ni.
Real Madrid hian last 16 lamah Manchester City leh Sporting inkhela tlang zawk zawk an hmachhawn ang.
Inkhelh banah goal khat thuntu Real midfielder Tchouameni chuan an result sual chhuah kha racism dotu zawng zawngte tan hnehna a nih thu sawiin, diriam hlawh thang a team-mate Vinicius pawhin inrintawkna a kalpui zel thei tih leh Prestianni tana inkhelh an phalsak ve ta lo kha thutlukna diktak nia a ngaih thu a sawi.
Real Madrid leh England defender Trent Alexander-Arnold pawhin Vinicius kha a career-ah mie’n chhaihbuai chamchi mah se khelmual chhungah a buai tak tak ngai lo a, hahdam dapin a inkhel zel thei a, rilru lama a paukhauhzia pholanna atan goal thun kher pawh a mamawh lo niin a sawi ve bawk.
Real Madrid khelmualah khan match tan hmain Spanish tawnga ‘no to racism’ tih inziahna banner lianpui an tarchhuak a; an mihang player goal thun thei an thlawpzia an lantir zanah Vinicius Jr ngei chuan goal khat a thawh leh a; inkhelh banah Brazilian hian social media lamah post siamin, ‘kan lam chhunzawm zel e’ tih a tarchhuak.
Chelsea forward hlui Joe Cole pawhin TNT Sports lamah Vinicius fakna auchhuahpuiin, a ke pahnih a hman thiam dan ropui a tih thu a sawi chhuak.
Real Madrid boss Alvaro Arbeloa pawhin a forward goal khung kha goal ropui a nih thu leh khati ang goal mit la zual bik thun kha a phu reng niin a sawi a; Real goalkeeper Thibaut Courtois pawhin lo belhchhahin, a goal thun lawma corner flag bula Vini han lam vel hmuh kha hlimawm veng veng a tih thu a zep zo bik lo!
Nilaini game kha kum 2010-13 chhunga manager hna a thawh tawhna Real Madrid home-a Jose Mourinho kirleh vawi khatna niin, Lisbon khaw first leg-a red card a hmuh avangin khelmual sira technical area-ah thut hmun rem chungin a naute a kilkawi thei lo thung.
Kylian Mbappe pawh khup hliam avangin a inkhel thei lo a; nikum December leh kumin January thlaah pawh a khup na hi lo buaipui tawhin, tun thla La Liga match pakhata Real Sociedad an hmachhawn tum pawhin a inlan thei lo tawh bawk.
Kum 27-a upa French forward hi tun season-a an club top scorer ni mekin, goal 38 a khawl tlin tawh zinga goal 23 chu La Liga lama a thun a ni a, Champions League goal 13 tehreng a khung tling tawh bawk!
Group stage khelh laia Benfica laka 4-2-a an tlawmna inkhela match official laka tawngkam mawi lo a cheh avangin forward Rodrygo pawhin match hnih hremna a la tuar rih a; heti a nih avang hian Santiago Bernabeu-ah Arbeloa khan forward pali chiah rin tur a nei a, chu’ngte chu – Vinicius Jr, Gonzalo Garcia, Brahim Diaz leh rawlthar kum 18 leka upa Franco Mastantuono-te an ni.
Midfield department lamah pawh kaihza tha na avangin Real midfielder Jude Bellingham chhawr theih a la ni lo bawk.
Benfica lakah Real chak nawn leh
