Benson Boone ‘Beautiful Things’-in 2024 IFPI Global Single Award a dawng

Benson Boone ‘Beautiful Things’-in
2024 IFPI Global Single Award a dawng
Benson Boone tan 2024 kha kum tha a ni a, rimawi khawvela a hming a rawn chher tan tak takna a nih rualin, a hla hit ‘Beautiful Things’ kum khat chhunga hla lar berah an thlang a, 2024 atan IFPI Gobal Single Award hlan a ni a, hei hian digital format hrang hrangah 2024-a khawvela hla hralh kal ber a ni tih a lantir.
Beautiful Things hla hi nikum January-a a tlangzarh kha niin, kumin IFPI Global Single Chart-ah No.1 a ni a, IFPI Global Chart Top 10-ah a vawi khat lanna a ni bawk. Hei bakah hian Billboard Music Awards, MTV Video Music Awards leh MTV Europe Music Awards te a dawng tawh bawk.
Benson Boone, kum 21, hi 2025 Grammy Awards-ah pawh khan best new artist-ah nominate a ni a, award semnaah hian a hla hit hi a perform bawk. ‘Beautiful Things’ hi Billboard Hot 100 (singles) chart-ah No.1 kai lo mah se rei ngial chu No.2 a ni a, khawvel ram hrang hrang chart-ah No.1 a ni thei a, Billboard Global 200 chart-ah No.1 a ni thei bawk.
Kum 2024 calendar year-ah ‘Beautiful Things’ hian khawvel huapin subscription stream tluklehdingawn 2.11 a nei thei niin IFPI-in data an tihchhuahah an tarlang a, heta hian paid subscription streaming, ad-supported platform leh single-track download te a tel bawk.
Victoria Oakley, CEO, IFPI chuan, “Benson Boone hnena IFPI Global Single Award kan hlan thei hi keini pawh kan hlim khawp mai. Khawvel huapa larchhuah nana hetiang khawpa khawvel dapchhuak hneh hit neih hi a ropui a ni. Benson leh a team-te kan lawmpui e,” a ti.
Boone hi a thian ten an group Battle of the Bands competition atan zawm ve tura an sawm atanga rimawi lama tui ve tan chauh a ni a, American Idol audition-ah inlanin, hetah hian judge ten stading ovation an lo pe nghe nghe. Mahse, he talent search show atang hian chhuakin, kawng dang a zawh ta a, Imagine Dragons lead singer Dan Reynolds-a label, Night Street Records/Warner Records-ah inziak lutin, tunah chuan khawvel top artist-ah a inhlangkai ta a ni.
2024 IFPI Global Single Chart-ah hian Sabrina Carpenter ‘Espresso’ chu No.2 niin, Teddy Swmins ‘Lose COntrol’ chu No.3 a ni. He chart top 10-a zaithiam pakua chu US artist vek an ni a, US a cheng ni lo awm chhun chu Irish Hozier niin, a hla ‘Too Sweet’ chu No.6 a ni. Taylor Swift hla, 2019-a a album ‘Lover’ ami, ‘Cruel Summer’ chu No.9-ah a rawn lang nawlh bawk a, he hla hi The Eras Tour avangin nikum khan a lar thar leh hle a, 2019-a a tihchhuah tawh kha 2024-ah a vanglai a thleng ta chauh zawk a ni.