Daily Newspaper

Bethany Sister-ten kum 100 tlin an lawm

17

Mary Mount Convent, Tlangnuam Aizawla Bethany Sister-te chuan an pawl kum 100 tlinna chu July 16 khan an convent, Tlangnuam Aizawlah inkhawm (mass) buatsaihin an lawm.

He inkhawm hi Bishop of Aizawl Most Rev. Stephen Rotluanga chuan a hlan a. Kum za chhung Pathianin Bethany Pawl a kaihhruai dan te; anmahni kaltlanga khawvel siamthatna hna thawh dan hrang hrangte sawiin, zirna lamah te, Kristian rinna tihchakna leh Thlarau lam rawngbawlnaah te, tar chak lo tan te, raltlan leh ruihhlo ngaite tana an hmalakna leh, damlo an enkawl dante a sawi a. Centenary an lawm ní hian Mary Mount School Aizawla Bethany Sister-te hnathawh tha tak takte chu sawi loh theih loh a nih thu a sawi bawk.

Kolasib-a St. Maria Goretti School leh hostel chungchangte, Madonna Education Centre (National Open School) hmanga drop out zirlai sang tam tak an lo enkawl tawhte leh enkawl mek te, Sihphíra Holy Angels School leh Bethany Rehabilitation Centre-a thalai ruihhlo ngai an enkawl chungchangte, Mamit-a St. Francis of Assisi High School chungchang te, Bethany Health Centre atanga HIV hri kai leh ruihhlo ngai an enkawlna chungchang te, hmeichhia leh nunau, an chhungte leh an pasalten an endawng leh an tihduhdah – Bethany Solace Home-a an enkawl dan te a sawi a. Kum 1962 June khan Bethany Pawl chuan Mizoramah an rawngbawlna thawk tanin, Mizo khawtlang tana an hnathawhte ropui a tih thu a sawi a ni.

Centenary lawmna tur hian 2020 July 11 atang khan hmachhawp siamin bul an lo tan tawh a. Hruaitu (leader) ni tura thalai 100 chherchhuah te, thiamthil hrang hranga hmeichhe 100 a thlawna training pek leh, in leh lo neilo mi harsate tana in 100 saksak tihte a ni a. Mizoramah in pathum chu in leh lo nei lo mi harsate an saksak a ni.

Aizawla Bethany Sister-te chuan an din champha leh an kum 100 tlinna hi Covid-19 leng vangin an tum leh inbuatsaih angin an lawm thei lo tih an sawi a. Bethany Sister-te awmna hmun apiangah mi harsa zawk tan a bawma eitur buatsaihin mi 100 tan an pe a ni. Hetiang hian an awmna hmun hrang hrang – Kolasib, Mamit leh Sihphirah te an buatsaih bawk a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy