Daily Newspaper

BETHLEHEMA NAUPIANG KHA

9

Mahmuaka Chhakchhuak

Chu naupang chuan a piantirh atanga zahawmna a ken nghal rualin khawvel a chawk buai nghal a, a tawng theih hma hauhin khawchhak lam atangin mifingte’n chibai an rawn buk nghal a, kum a rawn tlin meuh chuan Biakbuk-ah Danthu a zirtir thei tawh a, nu leh pate tan hnawksaka awm ngai lo nimahsela a kawng sialtu sialsak anga a awm avang erawh chuan zawn ngaiin a awm thung a, thiam thil neih nei loin chhungkaw lamah belhbul tur tha nei lo mahsela huaisen takin ke a pen thung a. Chapo theihna turin mi zawng zawng tluk theih rual lohin ropuina nei mahsela amah chu Carpenter fapa mai chauh a ni a, hmangaihna la na mi tak nimahsela hmeichhia mamawh lo tak a ni tlat thung si.

Thinlunga awm zawng zawng pawh a hmu tlang vek thei ang tih tur khawpin mitmeng fim kakin mi a melh thin a, fiamthu sawiin hun a hman hriat a ni ngai lo a, a hmel chuan fiamthu duh hmel a pu ngai hauh hek lo nain mitin in an ngaina em em thung a, tawngkam uar a hmang ngai lo a, a sawi chin erawh sawi nawn ngai lo tur khawpin a fiah fai tha thung a, a tawngkam chhuak chu chi-a al, khawngaihna tel a nih tlat avangin tun thlenga pulpit tlanga sawi tam ber a la ni a, Eiru leh Uire hmangte ngei pawhin thiamchanna atana vawiin thlenga an la sawi rik fo a ni bawk. Tlang chunga lungpui chunga thu chunga a thusawi te lah chu khawvel mifingte hian an la sawi bang thei lo a nih hi. A tawngkam chhuak reng reng chuan sawizui a hlawh vek mai a, thihna kross-a khai kan a nih hnua a tawngkam thlengin kan la sawi bang thei lo a nih hi.

Thawmhnaw a mamawh tam lo a, a neihchhun |huiloh Kawr erawh a ha ngawrh hle thung a, khawvela a dam chhan a chiang a, a tih tur chin a chian avangin chumi tihlawhtling tur chuan a sur a sa pawisa loin nitin hun a hmang a. Damchhung thilah in tihbuai a tum ngai lo a, thihhnu piahlam ram a thlir tlat thin avangin a hmangaihte’n damchhung thil chauh buaipui a hmuha a hriat avang chuan a mittui a tla hial a, a khawngaih takzet zawk a ni. Kross lera a awm thlengin hmeichhe hnenah thuchah ala sawi cheu bawk a. Tlawm takin nung mahsela sulhnu tam tak a hnutchhiah thung si. Ei leh in tur lam pawh a mamawh chu a tlachawpin a nei mai a, keiniin thla khat ei tur tia kan chhehkhawl ang hi ngai a ti ve lem lo a, chungleng savate hi en rawh u, buh an tuh lo a, an at hek lo a, buh inah an seng lut hek lo; nimahsela in Pa van ami chuan a chawm si a a ti zawk.

Nun awmzia a hria a, thian tam tak nei lo mahsela thiana a vawn tawh chu a thlah mai mai lo a, a thiante lah chuan tlanbosan thin mahsela a zawng chhuak leh hram hram thin a, chutichung chuan an hnenah lah sum leh pai lam hamthatna leh lawmman lam engmah pek ala tum lo mai pawh ni loin an hriat phak loh – Thih hnu piah lama hamthatna zawk chu an tan a buatsaih tih han hrilh chiang mahsela anni chuan hrethiam lo takin tukkhum an hiah san mai a, chuti chung chuan sawm leh pahnih zingah chuan pakhat chauhin zuk la phatsan duh a maw le! Lungngaihna avangin a thisen chu thlantui angin far hial mahsela amah tihhlum tumtute tan chuan ngaihdamna dilsak thei turin hmangaihna a la nei thei cheu a, chutih lai reng erawh erawh chuan a unau hmeichhiate tan pawha pangchan hleihtheih loh khawpin a rawngbawlnaah chuan a inpumpek thung bawk a.

Mi zawng zawng tana nung turin mitin tan rawngbawlna a nei a, an natna zawng zawng phurh a la inhuam cheu bawk a, chil chhak khumin hmuhsitna tinreng tuar mahsela ngawi rengin a tuar mai a, thiamthu sawi a tum ve lo a, thah phah hial dawn mahsela a nihna chu a zep chuang hek lo. A thih dawn darkarah takngial pawh a kianga awmte hnenah thlamuanna thu la sawi thei tlat turin midang tan nun a la hmang a ni. Chu Bethlehema naupiang chu Chatuan Pa a nih tlat avangin kan tan ngei pawh hian a la danglam lo a, a la pangngai reng a ni.

Ani chuan nun pawnlang, lemchan nun nena amah zuitu a mamawh lo a, nun tak leh belchian dawl nena zuitu a thlan zawk vangin sawmte chu tam tak, thlante chu tlemte tia a sawi nghe nghe kha. Keiniin hmaikawra hmanga, thiamchanna atan leh sual thupna atana a hming kan lam rik mai mai hi a huatzawng tak a nih vangin a ni chuan hrehawm pawisa loa mi zui lo chu ka mi ni tlak a ni lo e tiin a sawi a. Eiruin hremna a dawn ngai lohna leh Uire ngei pawhin inthlahrung hauh lo leh sual thupna mai atana Biakbuka ala lam ngam mai bakah Politician ten thiamloh an chan theih miah lohna ramah hian a hnungzui tlak tur hi kan tlemin a hre ve ngawtin a rinawm. Thinrimna berhbu leihbuak mai pawh chakawm tur khawpin vawi tam hi ngaihtuahna a hman thin a rinawm zawk hial a, a khawngaihna vang liau liaua min la zuah zawk te hi a ni hial zawk maithei e.

A tan chuan thian tur leh thurualpui tur hi kan ramah hi chuan an vang ngawtin a rinawm a, kan kawngka ngeiah rawn penlutin thian atan min sawm thin mahsela keini hian chhuanlam tha tak tak neiin kan lo hnar ang a, a hnungzui tur hian kan la inpeih lo nasa ngeiin a rinawm bawk. Ram hruaitu ber atanga pahmei inchhung thleng hian hla kaihlek – Lalpa kan zui ngam lo a che, nangmahin kal mai rawh’ tih hla hi tui takin sa ta thin zawk ila kan inhmeh tawk viau maithei bawk e. Vanram kai tak tak tum lem lo niawm taka Kohhran rawngbawltute thleng hian Harhtharna chang ta hlawm vek ila Zoram Khawvar kan thleng ni mai tur.

He Bethlehema Naupiang hian kan tan awmzia rawn nei tharin kan thinlung theuhah rawn piangthar nawn leh mawlh teh se.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy