Daily Newspaper

Bhushan min chhanna hi inhmusitna nasa zual a ni : SC

7

Chief Justice of India SA Bobde leh Supreme Court laka ngaihdam dilna siam duh lo Prashant Bhushan chu zilh ngei tur tiin sorkar lawyer KK Venugopal chuan a sawi.

“Ti nawn tawh suh tia zilha kaltir tur a ni ang” tiin Attorney General chuan Supreme Court hnenah a sawi a.

Supreme Court chuan Venugopal chu “Eng nge tih tur ni ang. Chhanna dang kan beisei,” tiin a hmain a hrilh a ni.

Sorkar lawyer chuan judge-a tang mek leh chawl tawh tam tak ten higher judiciary a corruption awm chu an lo sawi tawh thu a sawi a.

“Court chuan intifihlim la nangmah insiam tha rawh tiin hrilh mai se,” tiin Venugopal chuan a sawi a, Bhushan chu zilh a, mahse, hrem loh ni se tiin a sawi.

Thawhtanni khan Bhushan chuan court tihhmingchhiat tuma puhna chu hnawlin court-in ngaihdam dil tura hun a pek ni thum zawh rualin a dil loh tur thu a sawi a.

Bhushan chuan ngaihdam dilna, behchhan nei emaw nei lo emaw a siam chuan depde a nih tur thu sawiin ka thusawi ka sut leh a nih chuan ‘ka chhia leh tha hriatna namnulna a ni ang’ tihialin a sawi a, chumi avanga amah hremna kalpui a nih chuan lawm taka a pawm mai tur thu a sawi bawk.

Attorney General rawtna hi chhangin Justice Arun Mishra chuan, “A thil tih a dik lo tih a ngaihtuah duh reng reng chuang lo va. Ngaihdam dilna a siam hleinem. Tihsual theih a ni a, a chang chuan tihsual chiang tak siam theih a ni. Mahse, ani chuan a tidik lovah a inngai lo va. Miin a tihsual a pawm tlat si loh chuan engtia tih tur nge ni ang?” tiin a zawt let a.

Venugopal chuan, “Kei ngei pawhin Prashant Bhushan lakah hian CBI officers pahnih inbeihna awm laiin document phuahchawp siamah min puh avangin min hmusit ka ti hle mai a. Mahse, a hnuah a inchhir thu a sawi avangin contempt case file ka tum chu ka hnukdawk a ni. He case-ah pawh hian free speech a kalpui ang chiahin democracy zui ang u,” tiin a chhang a ni.

Court-in he thil hi a thlauhtlak theiha hriat thiamna rilru a pu a nih chuan a lawm em em tur thu a sawi bawk a. ‘A tihdik loh awma a hriat loh tho te chuan eng nge zilh a sawtna ni ang’ tiin Justice Mishra chuan a chhang thung a, “He institution hnualsuat zawng hian tawngkam a nei fo tawh a ni,” tiin a sawi zui bawk.

Attorney General chuan Bhushan an a chhanletna chu court-in ngaihtuah zui lo se a duhthu a sawi chu chhangin Justice Mishra chuan, ‘Eng vangin nge kan ngaihtuah loh ang? Mitin ten min sawisel a, a chhanna chhan let loh hi inhmuhsitna nasa zawk a ni. Paih bo ila, kan duhthua paihbo angah sawiin min dem ang’ tiin a sawi bawk.

Venugopal chuan Bhushan chuan kum 2009 khan judiciary corruption contempt case-ah a thusawi pawi a tih thu a sawi tawh thu sawiin, “Tun thilah pawh hian pawi a tih thu sawi se a puitling khawp ang,” tiin a sawi a.

Justice Mishra chuan, “A chhan letna kha chhiar ta che. ‘Supreme Court a tluchhia’ a ti a, a duhawm lo lo em ni?” tiin a chhang bawk.

(THE AIZAWL POST – Ramchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy