Bhutan Lal Jigme Khesar Namgyel Wangchuck chuan November ni 3 – 10 chhung India-a cham turin Zirtawpni hian India a lo thleng dawn a, Wangchuck hi China leh Bhutan ten ramri chungchanga an harsatnate su kiang tura inkawmna an neih hnu-a lo zin a ni.
Bhutan Lal hian Prime Minister Narendra Modi, external minister S Jaishankar leh India sorkar-a senior officials te a hmu dawn a, Bhutan nena inri Assam leh Maharashtra state-te a tlawh bawk ang. India leh Bhutan te hian thian leh thawhhona danglam tak inhriatthiam tawnna leh inrin tawnna an nei a ni. Bhutan Lal-in India a tlawh hian ram pahnih te tan thawh dunna remchang a siam dawn a, sectors hrang hranga thawhhona leh inthianna danglam bik a siam dawn a ni, tiin thu chhuah chuan a sawi.
Bhutan Lal lo zin tur hi kar liam ta lawka Bhutan leh China ten ramri chungchanga Beijing-ah inbiakna an neih vawi 25-na leh ram pahnih ten thawh dunna thuthlung an siam “Responsibilities and Functions of the Join Technical Team (JTT) on the Delimitation and Demarcation of the Bhutan-China Boundary” tih an signed zawh hnua lo kal tur a ni. Ram pahnihte hian kum 2016 khan ramri chungchang-ah inbiakna an lo nei tawh a, ramri chinfel dan kawnga inremsiamna thar pathum chu 2021-ah an siam leh a ni. Bhutan foreign minister Tandi Dorji chuan China foreign minister Wang Yi chu Beijing ah hmuin vice foreign minister Sun Weidong nen ramri chungchang an sawi dun bawk a ni. Thawhhona thuthlung an siama ram pahnih te hian ramri chungchang hi tihfel vat an duh ve ve a ni. Hmanni lawka China leh Bhutan te inbiakna hi chak takin a darh a, New Delhi chu a lo ngaihven ber tu te zing ami a ni. Mipui chinchang hre deuh te chuan Bhutan Lal-in China a tlawh hian Bhutan leh China ramri buaina chu India kaihhruaina hnuaia sawi a duh vang niin an sawi a ni.
Bhutan Lal Namgyel Wangchuck India-ah
