Hachhek bial mipuite chu an bial tan bakah an chhungkua leh mimala an hlawkpui theih tur MLA thlang turin MNF minister Robert Romawia Royte chuan a chah.
Hachhek biala khaw hrang hrang a tlawhnaah MNF adviser ni bawk Robert Romawia Royte chuan Mizoram hmasawnnain khawthlang lam a hawi, tia sawiin, chief minister Pu Zoramthanga chu Hachhek bialah term khat chhungin vawi 5 a lut tawh a; tunhnai maiah Hachhek biala kawngpui siamna tur cheng nuai 5000 an ruahman tawh tih te a sawi.
“Hachhek bial hian hmasawn turin dikna chanvo a nei. MLA bial bakah mimal leh chhungkaw tana hlawkpui theih thlang thiam turin mipui ka sawm a ni. Pu Robert-a in thlantlin chuan mahni leh mahni in inthlangtling tihna a ni ang. Kei pawh thlantlin tlakin awm ka tum ang,” a ti. Sawrkar kal tawhah he bial tana hmalakna a chak tawk lo thin tih a sawi bawk.
Pu Zoramthanga kaihhruai MNF sawrkar chu hnam behchhan a nih thu leh Zohnahthlakte tan innghahna a nih thu a sawi a ni.
Bial tan bakah chhungkua leh mimal hlawkpui tur thlang ru – Robert Romawia
