Mizoram Presbyterian Kohhran bial vawngtu pastor-te chu June 17 atang khan Synod Conference Centre-ah an intuaithar a, then hrang hrangin kalpui a ni.
June 17-19 chhung khan a thawh khatnaah Aizawl district huamchhunga bial vawng pastor 44-in an chhim a. June 19-21 khan a thawh hnihna neiin, Aizawl, Saitual leh Serchhip district huamchhunga pastor 47 an tel.
Thawh thumna hi June 24-26 chhungin Kolasib leh Mamit district huamchhunga bial vawngtu pastor-te tan Synod Conference Centre Aizawlah; July 2-4 chhungin Lungleiah Chhim Bial leh Serchhip district huamchhunga pastor bial vawng mekte tan buatsaih a ni ang. July 16-18 chhungin Champhai leh Khawzawl district huamchhung amite tan Champhaiah buatsaih a ni leh ang.
Pastor-te infuihtharnaah hian Synod Puipaten thupui hrang hrang – Pastoral ministry kaihhruaina, kohhran mite ngaihsak, tunlai huna pastor-te inpekna leh pastor-te leh tunlai khawvel, tih hmangin thu an sawi a ni.
Mizoram Presbyterian Kohhran hnuaia upate intuaitharna Lay Leaders’ Training vawi 226-na chu June 18-21 chhung khan Synod Multipurpose Training Centre Aizawlah buatsaih a ni bawk a. Tun tum training-ah hian Presbytery 8 – Aizawl West II, Aizawl Hmar, Chhawrpial, Tuivai, Tuichangral North, Tuichangral South, Hmarchhak leh Chhimchhak Presbytery atangin kohhran upa 40 an tel a ni.
Bial vawngtu pastor intuaithar
