US President Joe Biden chuan world history chu ‘a inthleplut kuai mek’ tia sawiin Ukraine leh Israel te tan indona an tawh mek avangin tanpuina dollar billion tel an mamawh thu a sawi.
White House a thusawina a neihah Hamas leh Russia te chuan ‘an thenawm democracy ram te nuaichimih’ an tum a ni tiin a sawi a.
President Joe Biden chuan urgent funding heng ram te tan hian a ngen tur thu sawiin Congress hnenah $105 billion an dil tur thu a sawi bawk a.
Joe Biden chuan Ningani khan a president nih chhunga Oval Office atanga ram tana thuchah a sawi tum hnihna chauh la ni chu a kalpui a.
Biden chuan emergency aid an ngenna chu ‘nakin zela American security atana la pawimawh tur’ tiin a sawi.
Minute 15 thusawina a neihah US-a Jews emaw Muslim te laka huatna kalpui chu a dem thu sawiin tunkara palestinian-American Wadea al-Fayoume kum ruk leka naupangin vih a tawk chu a dem thu a sawi bawk a.
“Engti kawng pawhin Juda huatna (anti-Semitism) hi kan hnawl a ngai,” tia sawiin, “Islam huatna (Islamophobia) pawh kan hnawl a ngai a ni,” a ti bawk.
White House chuan official-in engmah aid package sawi lan a la nei lo thung a. Mahse, a landanah Ukraine hnenah $60 billion, Israel hnenah $14 billion pek tum nia sawi a ni a. Hei bakah hian humanitarian kaihhnawihah $10 billion, Indo-Pacific region Taiwan pawh telin tanpui nan $7 billion leh US border security atan $14 billion dah tum nia sawi a ni.
Biden chuan Gaza-a Palestinian te tawrhna pawh sawi langin an tawrhpui thu a sawi a, a hma lawka Israel a tlawhnaah pawh Hamas beihna avanga Israeli leh US khua leh tui tuartute a tlawh bawk a.
Democrats te chuan tanpuina pekchhuah tumah Ukraine tanpui an tumna a hmaa Republican tena an dodal avanga tlang ta lo chu remchangah lain an thil tel bawk a.
Mahse US Congress chuan harsatna tawk mek thungin House Republicans te chuan Kevin McCarthy thehchhuah a nih hnuah amah thlaktu tur an la hmu zo thei lo thung a.
Biden, democrat ni bawk chuan US politics buai mek chungchang chu sawi lanna a nei lo thung a. Mahse, ram chhungah politics thila harsatna an tawh mek thu erawh a sawi lang thung a.
“Heng harsatnate hi kan pelh a ngai a. Ram ropui kan nih angin kan mawhphurhna hlen thei lova min siam kan remti tur a ni lo,” tiin a sawi bawk a.
“Firfiak Hamas leh nunrawng Putin tena chakna an chan kan remti tur a ni lo. Chutiang chu a thlen ka phal hek lo,” tiin a sawi bawk.
Biden rawtna hi a tlang ang em tih hriat a ni lo va, Senate-a Republican leader te chuan ngaihtuah ho an remtih thu an sawi a, mahse, party chhungah ngaihdan inang lo a nasa thung a.
Republican pariat lai Kansas Senator Roger Marshall kaihhruai te chuan, “Buaina hi thil inang lo leh danglam daih a ni a, Israel puihna kalpui tumnaah Ukraine bilh tel tum chu a dik lovang,” tiin a sawi thung.
Ohio Republican Senator JD Vance chuan Biden chu thil inang lo lutuk pahnih thlunzawm tumah a puh bawk a. “Israel-a naupang thi te chu Ukraine policy hlawhchham hralh nana hman a tum a ni,” tiin a sawi zui bawk.
Biden-a’n Israel leh Ukraine puih duh
