US President Joe Biden chuan Russia-in US nena New Start nuclear arms treaty a hnawl chu tihsual lian tak, a tihsak.
President Vladimir Putin chuan Thawhlehni khan ram pum huapa thusawina a neihah New Start nuclear arms treaty atanga an inhnuhdawh thu a puang a ni.
He inremna hi kum 2010 khan US leh Russia tena nuclear warheads-a bituk chin an neih theih nan leh an ralthuamte an inenfiahsak tawn theihna tura siam a ni a.
Biden hian Poland-ah Nato allies te a hmu bawk a. Eastern European ram intelkhawmte hi ‘Bucharest Nine’ tia sawi niin Russia-in Ukraine a run duh loh tak te an ni.
Putin-an US nena nuclear treaty siam a hnawlna hi Russia parliament pahnihte chuan Nilaini khan an pawmpui zui nghal bawk a. Russia foreign ministry chuan inremna siam chu hnawl mah se New Start treaty in khuahkhirhna a siam te chu mawhphurhna la tak chunga an kalpui zui tur thu a sawi tho thung.
Bucharest Nine nations leaders te nena meeting an neih hmain Biden chuan Russia-in New Star treaty a hnawl chu ‘tihsual lian tak’ tiin a sawi a, US Chuan Nato military alliance-ah nasa zawkin inhnamhnawihna a nei zel dawn a ti bawk a.
“Article 5 hi United States tan chuan inpekna sawi buai theih loh a ni a. Nato ram inchi tin hi kan venghim ang,” tiin a sawi a. Article 5 hian Nato member state te chuan beih an tawk a nih chuan Nato in inthurualin an bei let zel ang tih a ni.
Meeting neih zuinaah Biden chuan leaders te hnenah nasa zawka thahwhona tha kalpui a ngai a ti a. A hnua joint statement tihchhuahah pawh Bucharest Nine te chuan an ram tinah Nato chu nasa zawka inbun nghet turin an ti bawk.
Putin thung chuan Moscow-a thusawina a neihah Russia-in Ukraine a beihna chu ‘historical’ land neih let tumna a ni a ti a. “Kan sipai ten indona an hmachhawn mek a, tun hma atanga kan ram, kan mipuite tana kan beihna a ni,” tiin a sawi.
Eng nge New Start treaty?
Kum 2010 khan khatih laia US president Barack Obama leh Russia Dmitry Medvedev tena inemna an ziah niin New Start treaty chu nuclear war danna tura inremna a ni. He inremna hmang hian ram pahnih tena strategic nuclear warheads an neih theih chin bituk siam a ni a, ram pahnihte chuan an inenfiahsak tawn ve ve remtih a ni bawk.
Inremna hi kum 2011 khan nung tanin kum 10 chhung atan nung tura tih zui nghal a ni a, mahse, ralthuam inenfiah tawnsak chu Covid pandemic khan a tikhaihlak thung.
Ram pahnihte hian long-range nuclear warheads 1,550 bak an neih remtih loh a ni a, ram pahnih te hi Cold War rival hlui niin khawvela nuclear ralthuam nei ngah dun ber an ni bawk a. A hma chuan Russia-in Ukraine indona a awm chungin New Start treaty chu tihhhlawhtlina kalpui zel a duh thu a sawi a, tunah erawh a hnawl ta a ni.