Daily Newspaper

Biden puitu Afghan mi a chhungte nen chhanchhuak

21

Afghan tawng lettu leh senator a nih laia Joe Biden Afghan thingtlang hmun derthawng taka a awm laia chhanchhuaktu chu a chhungte nen US-in Afghanistan atangin a thiarchhuak.

Kum 2008 khan Biden leh US lawmaker dangte phurtu military helicopter chu vur thli tleh nasa avangin phaizawl vura khatah tum lo thei lovin an awm a, lambun awlsam lutukin an awm phah a ni.

Aman Khalili chu US sorkar in Afghan employee a neih zinga Biden te hmun hima thiartu zinga tel a ni a.

August thla atang khan Afghanistan chhuahsan tumin hma a la tawh a, visa lamah harsatna a tawk zel a, Tunah erawh Taliban rorelna chhuahsanin a chhungte nen Afghanistan an chhuahsan tawh thung.

US State Department chuan Khalili leh a chhungte chuan ‘him taka Afghanistan chhuahsanin Pakistan atangin US an lut ang’ tiin a tarlang.

“Khalil tena Afghanistan an chhuahsan theih nan hian US sorkar chuan hma a la a, min puitu zawng zawngte hnenah lawmthu kan sawi” tiin tarlan a ni bawk.

Kum sawm pathum kaltaa Joe Biden mai bakah senator Chuch Hagel leh John Kerry te puia hmun hima thiartu Khalili chu Afghansitan a chhuahsan theih nan US Special Immigrant Visa (SIV) pek in a awm a ni.

US-in Afghanistan an chhuahsan veleh Khalili chuan Biden chu biain amah leh a nupui leh fa panga te chu chhanchhuak turin a ngen a. “Ka ring a ni. Engkim a tihtheih ka ring nghet bur,” tiin Khalili chuan Biden chungchang a sawi a.

Khalili chungchangah hian September thla khan White House Press Secretary Jen Psaki chuan ‘Vur tla nasa karah kan mi pawimawh ber ber te chhanchhuaktu niin a hnathawhah kan lawm a ni’ tiin a lo sawi tawh bawk a. US chuan a thawhpuite chu a chhanchhuah vek tur thu a sawi bawk.

Afghan mite chhanchhuahna kawnga hmalatu pawl Human First Coalition te chuan Khalili leh a chhungte him taka chhanchhuah an nih theihnaah US leh Pakistan sorkar lakah lawmthu an sawi bawk.

US SIV hi Afghans leh Iraqis te American sipai te puitu te tan bika siam a ni a. Kum 2008 atang khan US-ah Afghans 70,000 chuang lakluh an ni tawh a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy