McDonald’s-in burger an siam, lian tha leng lawng tak, Big Mac an tih hi pakhat pawh puar pui awl tham a ni a, chutiang Big Mac chu Don Gorske chuan a ngaina em em mai a, tunah hian kum 70 mi tawhin, a dam chhunga Big Mac a ei tawh zawng zawng chu 34,000 chuang a ni tawh a, Guinness World Record, Big Mac ei hnem ber record a siam.
Don Gorske hi Fond du Lac, Wisconsin a cheng, prison officer atanga chawl tawh a ni a, May ni 17, 1972 atang khan a vawi khat nan Big Mac hi a tem chhin a, tui a ti em em mai a, chuta tang chuan a Big Mac leina receipt leh a bawm te chu a dah tha ta zel mai a ni.
Hriselna lamah fast-food ei nasat lutuk a that loh thu te pawh a dawng a, mahsem Big Mac chu a thlah thei chuang lo. A ei nasat vanglai chuan nikhatah Big Mac pakua te a ei thin a, McDonald’s pawhin an customer duhawm berah te pawh an lo puang tawh a ni.
Mahse, tunah chuan a kum a lo tam ve ta deuh a, Big Mac pawh ni khatah pahnih chauh a ei ta a, fries a ei tel duh ta lo bawk. Exercise atan tiin nitin mel 6 a thui a kal ziah bawk a, a theih chhung chu Big Mac hi ei reng a tum a ni. Gorske hian 2023-ah ringawt pawh khan Big Mac 728 a ei hman a, tichuan 1972 atanga a Big Mac ei tawh zawng zawng chu 34,128 a tling tawh.
Big Mac 34,000 chuang ei tawhin record a siam
