Kum sawm chhunga party thawhpui thlak thut thut (flip-flop) tum ngana kalpuiin Nitish Kumar chuan lalu Prasad Yadav kaihhruai Rashtriya Janata Dal nena an thawhdunna titawpin Bihar Chief Minister atangin a bang zui bawk a. A ban hnu reiloteah a thawhpui hlui BJP te nen sorkar thar an siam tur thu a puang zui nghal a ni.
Pathianni zing khan Kumar chuan Bihar Governor Rajendra Arlekar hmu in banna a thehlut a. Governor chuan Kumar chu sorkar thar pian hma chu Chief Minister nihna hmui rih turin a ngen a. A hnu lawkah BJP legislator tena an thlawpna a thehlut leh a, Governor chuan lo pawmin Nitish Kumar chu a tum kua nan Chief Minister a ni dawn ta a ni.
“Chief Minister atangin ka bang a, he sorkar hi tihtawp a ni. Hmun hrang hrang atangin thurawn ka dawng a. Alliance hmasa kha a thar siam duh vangin ka chhuahsan tawh a, boruak that loh vang a ni. Ka bang a ni” tiin a sawi.
Kumar chuan party member tena thurawn an pek anga thutlukna siam a nih thu a sawi a. “Kan alliance-ah hnathawh a har a, chung chu ka sawifiah hnuah party member ten bang turin min ti a ni” tiin a sawi.
INDIA alliance chungchang pawh sawiin hma an sawn lo a ti a. “INDIA alliance siamtu ka ni a, midangin engmah tih an nei lo” tiin a sawi bawk a. Kumar chu INDIA bloc din a nih theih nana Opposition leader sulstu ber pakhat a ni a. INDIA alliance a chhuahsan avangin Opposition bloc te tan Lok Sabha inthlan dawnruaiah buaithlak tak tur a ni dawn a ni.
Kumar hian Emergency lai Indira Ganhdi sorkar lai beiin political career a tan a, good governance aupuiin khatihlia RJD sorkar hmingchhe tak chu a bei a, tun hnai kum sawm chhungin thawhpui thlak kual rengin hun a hmang bawk.
Nikum khan BJP te chuan Kumar nena thawhhona kawngka chatuanin an khar an tia, mahse, an thawkdun leh ta a ni. BJP general secretary Vinod Tawde chuan Bihar BJP president Samrat Choudhary leh Assembly a party leader Vijay Sinha te chu Deputy Chief Minister an ni ang a ti bawk a.
Sorkar thar siam turah chuan JDU, BJP leh Chief Minister Jitan Ram Manjhi’s Hindustani Awam Morcha (Secular) atangin cabinet ruat a ni ang tih a ni bawk.
Nikum khan Union Home Minister Amit Shah chuan JDU leader Nitish Kumar tan kawngka chatuanin an khar tawh tiin a sawi a. Tunah erawh Lok Sabha inthlan hma lawkin an thawhpui leh ta a ni.
Eng vangin nge BJP ten Nitish Kumar an pawm leh? Kumar chu Opposition INDIA bloc hotu langsar niin Congress leader Jairam Ramesh chuan Kumar chu INDIA meeting kotu a nih avangin a tawp thlengin BJP te a do tura an ngaih a nih thu a sawi.
BJP te tan chuan Nitish Kumar lamtanga an neih chuan Bihar LokSabha seat 40 zet awmah leh INDIA bloc chakna tura ngaihah an dinhmun a thatphah hle dawn a ni.
Bengal-ah Congress leh Trinamool Congress inkar a tha lo va, Punjab-ah Congress leh AAP inkarna a tha lo bawk a, chungte chu seat insem dan chungchangah vek a ni. Bihar a RJD-JDU inkara chhia chu INDIA bloc tan chuan lu tihaitu tak tur a ni bawk.
Kum sawm chhung vel chu Nitish Kumar chuan flip-flop reng chungin dinhmun tha a chelh char char thei tho va. Mahse, a larna erawh a tlahniam nasain inthlanah pawh an party an tlahniam zual zel bawk. Tun hma chuan Sushashan Babu-the development man tih ni thin kha tunah chuan ‘paltu kumar’ lamtang thlak renga an ti tawh.
Kum 2010 Bihar inthlanah khan seat 115 JDU a lakpui laiin kum 2015 ah chuan seat 71 chauh an la a, kum 2020 inthlanah phei kha chuan seat 43 chauh an la tawh a, Bihar Assembly a JDU dinhmun chu tlahniam mek zel a ni.
Nitish Kumar chuan Chief Minister chair luah mahse Bihar Assembly ah party lian ber pathumna an ni chauh a, RJD leh BJP MLA ngah lamah a phak chuang lo. Hei vang tak hian BJP te chuan Kumar an chief minister nihna chelh mahse Bihar sorkar thutlukna siamah JDU te aiin thuneihna an nei zawk dawn tih an chiang a, BJP te tan chuan win-win situation dik tak a ni.
Bihar-ah JDU leh BJP sorkar ding dawn
