Bihar-ah NDA-in chiang takin hnehna chang dawn

Bihar-ah NDA-in chiang takin hnehna chang dawn
Zirtawpni khan Bihar assembly inthlan leh state pasariha bye-election-a vote tlate chu chhiar a ni a. Ngaihven hlawh ber, Bihar-ah BJP kaihhruai National Democratic Alliance (NDA) chuan hnehna an chang ngei dawn tih a lang tawh.
Janata Dal (United) hruaitu, Chief Minister Nitish Kumar-a hovin rorel lai tangrual hian bial 243 awma sorkar siam tura MLA 122 neih ngaiah he chanchin ziah lai thleng hian bial 189-ah hma an hruai mek a, ‘chak’ tia puan ni lo mah se chak tura ngaih an ni.
NDA-a tel zingah hian BJP chuan bial 84-ah hma an hruai a. Chief Minister Kumar-a kaihhruai JDU-in 76-ah, Union Minister Chirag Paswan-a kaihhruai Lok Janshakti Party (Ram Vilas)-in 22-ah, Union Minister Jitan Ram Manjhi-a kaihhruai Hindustani Awam Morcha (HAM)-in bial ngaah leh Rajya Sabha MP Upendra Kushwaha-a kaihhruai Rashtriya Lok Morcha-in bial hnihah hma an hruai mek.
Eptu tangrual, Mahagathbandhan-in bial 50-ah hma an hruai ve mek a. Chief minister atana an zawrh, Rashtiya Janata Dal (RJD) chuan an hruaitu, Tejashwi Yadav-a hovin bial 34-ah hma an hruai mek a, Congress leh CPI(ML)(L)-in bial ruk leh CPM-in bial khatah hma an hruai mek.
Inthlan strategist thin, Prashant Kishor-a kaihhruai, Jan Suraaj pawhin bial liah hma an hruai a, anni exit poll-ah bial lak nei miah lo tura ngaih an ni a, beisei aiin an che tha a. Sorkar erawh an siam theih dawn loh avangin an chak loh thu an pawm tawh.
Lok Sabha MP Asaduddin Owaisi-a kaihhruai, AIMIM pawhin bial thumah hma an hruai ve mek bawk.
Mahagathbandhan atang hian chief minister atana an zawrh ber, Yadav-a chuan an chhungkaw thatna thin, Raghopur bialah a hnufual zawkah a tang mek a. Zaithiam kum 25 mi, Maithili Thakur-i chuan inthlan a chuh vawi khatnaah BJP hminga dingin Alinagar bialah hma hruaiin a tlin a beiseiawm hle.
Tejashwi Yadav-a unaupa, Tej Pratap Yadav-a pawhin a party thar din, Janshakti Janta Dal hminga inthlan chuhin vote 12,000 chuangin a hnufual mek.
Inthlan vote thlak zawh hnu lawka exit poll-ah khan NDA hian bial 146 vel an lak rin a ni a, sorkarna siam tur aia mamawh aia 24-a tam niin sorkar leh tura rin sa an ni a. RJD, Congress leh Left party-te telna, Mahagathbandhan chuan bial 92 chauh la tura ngaih niin inthlan hnuhnung bera bial 110 an lak aia tlem an lak rin a ni.
Kum 2020 khan BJP chuan an thawhpui, JDU aiin bial an la tam zawk a; mahse, party malah chuan RJD-in bial la tam berin 75 an la a, tun tumah erawh BJP an phak lo tura ngaih lawk an ni.
Bihar-ah hian mipuiten thawh hnihin, November 6 leh 11 khan vote an thlak a, tangrual lian tak pahnih hi inbei lian ber an ni.
Bihar inthlana vote tlate rualhian state pasariha assembly bial riata bye-election-a vote tlate chhiar a ni bawk a. Heng inthlannate hi Jammu & Kashmir-a Budgam leh Nagrota, Rajasthan-a Anta, Jharkhand-a Ghatsila, Telangana-a Jubilee Hills, Punjab-a Tarn Taran, Mizorama Dampa leh Odisha-a Nuapada bialte an ni.
Jammu & Kashmir-ah hian BJP candidate Devyani Rana chu Nagrota bialah a chak a, J&K National Panthers Party (India) candidate Harsh Dev Singh chu vote 24,647-in a hneh a. PDP candidate Aga Syed Muntazir Mehdi chuan he chanchin buatsaih lai hian Budgam-ah hma a hruai mek thung.
Mizoram-ah MNF candidate Dr. R. Lalthangliana chuan Dampa bialah rorel lai, ZPM candidate Vanlalsailova chu vote 562-in a hneh.
Odisha-ah BJP candidate Jay Dholakia-a’n Nuapada-ah hma a hruai mek a. Jharkhand-ah JMM candidate Somesh Chandra Soren chuan Ghatsila-ah hma a hruai mek a. Telangana-a Jubilee Hills-ah Congress candidate Naveen Yadav V chuan hma a hruai mek a. Rajasthan-a Anta-ah Congress candidate Pramod Jain Bhaya-a’n hma a hruai a. Punjab-a Tarn Taran-ah Aam Aadmi Party candidate Harmeet Singh Sandhu-a’n hma a hruai mek bawk.