BIHAR INTHLAN: NDA-in campaign khuh hawng, INDIA la buai?

BIHAR INTHLAN: NDA-in campaign khuh hawng, INDIA la buai?
Bihar assembly inthlan campaign thawm a len mek zel laiin INDIA tangrualin rorel lai, NDA dan beh tuma an beih meknaah an an inkarah neuh neuh awm ri a ring mek a. Hetih lai hian rorel lai lam hian Thawhlehni khan campaign an khuhhawng ta bawk.
Eptu tangrualte hian Rahul Gandhi-a hovin ‘Voter Adhikar Yatra’ hmanga boruak lian tak an siam hnuah a tawp lama an zuih deuh nia ngaih theihin an awm a, an dinna tur bial inchan semah a tawp thlengin an buai.
NDA-in bial tina an dintir turte tifela campaign rusum an thlak tawh laiin INDIA-a tangrualte hi inthlan chuh tura hming pek hun a tawp hnu thleng pawhin an la intifel thei lo zel nia sawi a ni.
Hming pek luh hun a tawp hnuah RJD chu eptu tangruala bial chang tam ber niin bial 143-ah candidate an nei a. Congress-in Lalganj biala an dintir a inhnuhdawh leh hnuah bial 59-ah ding an nei a. Kum 2020 inthlanah khan RJD hian bial 144-ah leh Congress-in 70-ah an chuh.
An zinga mi, Mukesh Sahani-a kaihhruai VIP-in bial 15-ah candidate neiin CPI(ML)-in bial 20, CPI-in pakua leh CPM-in paliah candidate an nei bawk.
Rorel lai tangrualte sawi duh tur takin INDIA-a tel party-te hi bial eng emaw zatah an indin thuat a. Sikandra, Kahalgaon, Sultanganj leh Narkatiaganj-ah RJD leh Congress hian candidate an nei ve ve theuh va; Rajapakar, Kargahar leh Bihar Sharif-ah Congress leh CPI an indin thuah bawk.
Lalganj pawh din an inchuhna bial a ni a; mahse, Congress-in ding tura an tih, Aditya Kumar Raja-a chuan a hming a pek hnuah a inhnukdawk leh a. RJD hruaitu, Shivani Shukla chu tangrual aiawhin a ding dawn ta a ni.
RJD hian din ve an duhna dang, Kutumba bialah candidate dah lovin Congress state president Rajesh Ram-a an pui dawn ve thung bawk.
Congress leh RJD hruaitute chuan chuh tura hming pek luh theih hun tawp hmain inhnukdawk leh an awm nen, an inching fel thei niin an insawi a. Hetih lai hian November 6-a inthlan thawh khatna atana hming pek luh hun tawp ni thlengin neuh neuh a awm ngei tih a chiang a. Thawh hnihna atana inhnuhdawk hun chu Ningani hian a tawp ve bawk ang.
A lan danah chuan INDIA-a tangrualte hi hmun thenkhatah chuan an inbeih a ngai ngei dawn a, party worker leh tual chhunga hruaitute pawh an buai nia sawi a awm.
Thawh hnihna inthlan tura inhnukdawk an awm lo a nih chuan vote a tithen thei ngei dawn a, NDA tan hun remchang tha tak an siam thei dawn nia ngai an awm mek bawk.
Hetih lai hian Thawhlehni khan Chief Minister Nitish Kumar-a chuan Minapur, Muzaffarpur-ah NDA campaign a khuh hawng a, mipuite chu kum 20 ro a rel chhunga hna siam, zirna, kawng leh hriselna kawnga a hmalakna hre thar leh turin a sawm.
Chief minister hian RJD rorel lai sawi chhuakin, “Bihar-a thuneihna kan chan hma kha in la hria em? Khua a thim hnuah pawnah mi an chhuak ngam lo va, buainain khawtlang a tuam a, kawng a chhia a, electricity lah in tlem chauhvin an nei a, zirna lah a chhe em em bawk,” a ti.
“Thuneihna kan chan hnuah Bihar-ah dan kenkawh a ni ta a. Tunah chuan muanna leh inngeihna boruakah kan awm ta a ni,” a ti.
Kumar-a chuan kum 20 liam ta chhungin Bihar-in hawi zawng thar leh hmasawnna, sorkar tha leh khawtlang inrelbawlna tha hmangin nihnna thar a nei ta tih a sawi a. An state chu thimna atangin hmasawnna, rinngam leh remchang tha awmnaah a chuang chhuak ta tih a sawi.
Bihar hi November 6 leh 11-ah thawh hniha inthlang tur an ni a, November 14-ah vote tlate chhiar a ni ang.