BIHAR INTHLAN: RJD-in an hruaitu 27 an hnawt chhuak

BIHAR INTHLAN: RJD-in an hruaitu 27 an hnawt chhuak
Bihar inthlan hun hnai tawh taka Nitish Kumar-a kaihhruai NDA tangrual nena inbei tawk ber tura ngaih, Rashtriya Janata Dal (RJD) chuan Thawhtanni khan an hruaitu mi 27 chu an party do leh kalh zawnga chea puhin kum ruk chhung atan an hnawh chhuak.
Bihar-ah hian an state-a kûtpui ber, Chhath Puja an lawm mek lai leh inthlan hma lawk a nih tawh laiin hetiang hi a thleng a. Inthlan hi thawh hnihin, November 6 leh 11-ah neih tur niin vote tlate hi November 14-ah chhiar a ni ang.
Party atanga an hnawh chhuah zingah hian MLA tang lai, MLA hlui leh state leh district-a nihna pawimawh tak tak chelhtute pawh an tel.
An hnawh chhuak takte hian an duh chuan independent-in inthlan an chuh thei a, an chuh em loh a nih pawhin an party-in an candidate-te do zawngin khawi bialah pawh an campaign thei tih an sawi nghal.
Hetih lai hian Thawhtanni vek khan BJP pawhin an hruaitu pali chu party duh loh dan zawnga an chet avangin kum ruk chhung atan an hnawh chhuak ve bawk a. Heng mite hi party thu zawm lo leh party duh dan kalh zawnga hma laah an puh a ni.
Inthlan an hmabak maiah hian BJP leh JD(U) chuan bial 101 ve ve-ah inthlan an chuh dawn a. Rorel lai tangruala party lian pahnihte hi kum 2005 hnua bial inzata an din vawi khatna a ni.
Inrinniah khan Kumar-a kaihhruai, JD(U) pawh hian party duh dan kalha an chet avangin an hruaitu mi 16 an lo hnawt chhuak ve tawh bawk.
JD(U)-in an hnawh chhuah zingah hian minister hlui Shailesh Kumar, MLA tanglai Gopal Mandal leh MLA hlui pahnih, Shyam Bahadur Singh leh Sudarshan Kumar bakah MLC hlui leh tual chhunga an hruaitute pawh an tel.
JD(U) state General Secretary Chandan Kumar Singh-a’n hnawh chhuah an ni tih hriattirna a tihchhuahah chuan heng mite hi an party leh party dang nena an tanrualna do zawngin an che niin a tar lang a ni.
Politic hriate chuan hetianga JD(U) hruaitu hnawh chhuahte hi NDA-a telten an tanhona chhunga inphiarna awm thei hmeh mih an tumna niah an ngai a, inthlan an hmachhawn mai tur chu lungrual taka an hmachhawn theihna tura an tih niin an ring a ni.