Bihar Chief Minister Nitish Kumar-a chu thla tira Rajya Sabha-a chuhpuitu nei lova thlan tlin a nih hnuah Thawhtanni khan an state legislative council (MLC) member a nihna atangin a bâng a. A hnu lawkah amah ang bawka Rajya Sabha member-a thlan thar, BJP national president, Nitin Nabin-a’n a zui.
Chief minister vawi 10 lo ni tawh, Kumar-a hi March 16-a inthlanah khan Rajya Sabha member atan thlan a ni a, danpuiin rorelna in pahniha member nih kawp a phal loh avangin ni 14 chhung pakhat zawka member a nihna a kalsan a ngaih angin a MLC member a nihna chu a kalsan ta a ni.
JD(U) National Working President Sanjay Kumar Jha-a chuan kar hmasa khan thuthar lakhawmtute hnenah, “Danpuiah hian ni 14 chhunga bân tur thu a inziak a, chumi ang chuan thil a thleng dawn,” a lo ti tawh.
Jha-a hian kum 75 mi JD(U) supremo hi engtikah nge chief minister atanga a bân dawn tih zawhna erawh a chhang chiang lo thung.
Bihar-a chief minister hna chelh rei ber, Kumar-a hi April 9-ah Rajya Sabha member atan lak luh a nih a rinawm.
Kumar-a hi MLC atanga a bân avangin chief minister thutthleng a kalsan tel dawn em tih zawhna a awm mek a, a aiawhtu tur pawh inrinsiakna a nasa hle bawk.
BJP National President Nabin-a pawh March 16 thova Rajya Sabha member atana thlan tlin a nih hnuah Bihar MLC a nihna a bânsan ve bawk a. Ani hi Bankipur bialtu niin an state-ah hian minister pawh a lo ni tawh thin a ni.
Bihar MLC member atangin CM leh BJP president bâng
