Bill Gates hausakna kar khat chhunga 30%-a a tlak hniam avangin khawvel mihausa top 10-ah a lang pha ta lo

Bill Gates hausakna kar khat chhunga 30%-a a tlak hniam avangin khawvel mihausa top 10-ah a lang pha ta lo
Khawvela hausa te pawh lo ni tawh thin Bill Gates chu khawvela hausa zual 10 zingah a lang pha ta lo a, a thachhang dawltu ni thin, Microsoft-a CEO te pawh lo ni tawh Steve Ballmer chu top 10-ah lang tharin, Bill Gates hi hausa list-ah No.12 a ni ta. Bill Gates hlutna tlakhniamna chhan hi a thilphal vang a ni ber a, charity lama a inhman nasat avangin a sum bawm a phai ve ta deuh a ni.
Bill Gates hausakna hi ni sarih chhungin dollar tluklehdingawn 51-in a tlahniam a, chu chu a hlutna 30% vel dawn a ni. Kar kalta khan Bill Gates hausakna hi an chhut tha a, an chhut that hmaa a hausakna dollar tluklehdingawn 175 chu an dollar tluklehdingawn 124-ah a tlahniam ta dawrh mai a, Bloomberg Billionaire Index-ah No.5 atangin No.12-ah a tawlh ta hawn hawn mai a ni. Hetihrual hian Steve Ballmer hausakna chu dollar tluklehdingawn 172 niin, Bill Gates thlakin, hausa list-ah No.5 a rawn ni ve thung.
Tunah chuan Gates hian tech lama a sangawizawnpui te hausak lamah a pha ta lo nual mai a, Google-parent Alphabet co-founder Larry Page leh Sergey Brin, Nvidia CEO Jensen Huang te pawh a pha ta lo a, a thiantha Berkshire Hathaway CEO Warren Buffett pawh a pha ta lo.
Bill Gates hian May thla kalta khan a blog post-ah charity hrang hranga a sum theh chhuah dan te a tar chhuak a, hemi behchhan hian Bloomberg hian Bill Gates hlutna hi an chhut nawn sak leh ta a ni.
A blog post-ah Bill Gates hian a hausakna chu dollar tluklehdingawn 108 angin a tarlang a, a hausakna zawng zawng hi tun kum 20 lo awm leh tur chhunga Gates Foundation kaltlanga midangte tanpui nan theh chhuah vek a tum thu tarlangin, kum 2045-ah chuan Gates Foundation hian dollar tluklehdingawn 200 chuang midang tanpui nan an hmang hman tawh dawn niin a tarlang bawk.
Gates Foundation website-a an tarlan dan chuan Bill Gates leh a nupui hlui Melinda French Gates te chuan December 2024 thleng khan he foundation tan hian dollar tluklehdingawn 60 an inthawh tawm tawh a, Warren Buffett chuan dollar tluklehdingawn 43 a thawh ve thung.