Electric smart meter vuah mek vanga harsatna tawkte chuan bill pun dan dik lo emaw felhlel deuh emaw hmuhchhuah a awm a, bill pung dik lo sawrkarin a dawng a nih chuan mipui hnenah pe kir leh turin an phut tih an sawi.
Smart meter vanga harsatna tawk intelkhawm chu Nilaini khan Aizawlah pungkhawmin tharum tel loin lungawiloh an lantir a. Smart meter chu Aizawlah pawh la vuah kim loh a ni chungin sawiselna a tam hle a, meter bill hmasa aia a let 4/5 a sang, a let 10-a sang pawh an awm tih an sawi. Thingtlang lama vuah a nih hma in meter hi ennawn ni ngei se an duh tih an sawi a ni. Electric bill sang complaint chuan awmzia a nei lo thinin bill kal dan a mumal lo hle tih an sawi.
State tam takah smart meter hi dodalin, court-a zualko pawh an awm a, state thenkhatah chuan vuah ngei ngei tur tiin an kalpui lo nen, Mizoram sawrkar pawhin a duh chuan hetiang hian a kalpui ve theih lohna tur a awm lo tih an sawi bawk.
Resolution an pawm zingah smart meter vuah hnua electric bill sang nasa lutuk enfiah turin sawrkar an phut a; bill pun dan dik lo emaw felhlel deuh emaw hmuhchhuah a awmin bill pung dik lo sawrkarin a dawng a nih chuan mipui hnenah pe kir leh turin an phut. Complaint a awmin rang takin P&E department-in enfiah thin se, department leh company inhnawn kual se, an ti a. Smart meter vuah tawh sa leh la vuah loh pawh department-in uluk taka endik vekin, chumi hma chuan vuah chhunzawm tawh lo turin an phut tih an sawi a ni.
Billing period tih danglam dawnah emaw sawrkarin thil thar mipui sum bawm khawih che thei chi a chhawpchhuah dawn reng rengin mipuiah chiang taka hriattirin zirtirna pe hmasa tawh se, an ti.
Bill siam danah dik lo a awm chuan mipui pe let turin phut
