Site icon The Aizawl Post

Billboard 200-ah Morgan Wallen ‘One Thing at a Time’ a la No.1

Billboard 200-ah Morgan Wallen ‘One Thing at a Time’ a la No.1
Morgan Wallen album ‘One Thing at a Time’ chu Billboard 200 (albums) chart-ah a No.1 a, he chart-a a zawna kar hnih a No.1-na a ni ta. Hetihrual hian K-pop group TWICE leh Miley Cyrus te pawh chart top 5-ah an debut.
Billboard 200 hi kar khat chhunga US-a album hralh tam dan atanga tehin chart ranking siam a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
Morgan Wallen ‘One Thing at a Time’ hi copy 2,59,000 an hralh leh a, hei hi chart-ah a kar hnih nan a No.1 pui leh ta a, an tlangzarh hlimah kar khat chhunga copy 5,01,000 hralhin a No.1 tawh bawk a, tihian kar hnih chhungin US-ah copy 7,60,000 a hralh tling der tawh a ni.
One Thing at a Time an hralhna hi streaming atangin album copy 2,34,000 tlukpui (on-demand official stream maktaduai 308.06) niin, album tak tak hralh zat chu copy 21,000 a ni a, album-a hla mal hralhna atangin album 4,000 tlukpui an hralh thei bawk. Streaming-ah hian a kar khatnaah khan maktaduai 498.28 niin, chu chu core country album-ah chuan kar khat chhunga stream nasat ber niin, tuna stream maktaduai 308.06 pawh hi country album-ah chuan kar khat chhunga stream nasat ber dawttu a la ni pha tho bawk a ni.
TWICE album thar ‘Ready to Be’ chu copy 1,53,000 hralhin No.2-ah a debut a, kar khat chhunga an album hralh that ber record a la ni a, he chart top 10-a lang thei album pali an neihna a ni a, chart No.2 hi an tawn san ber a la ni bawk. An album hmasa ‘Between 1&2: 11th Mini Album’ leh ‘Formula of Love: O+T=û3’ te chu No.3 an lo kai pui ve ve tawh a, ‘The 3rd Full Album’ chu top 10 an lo kai pui tawh bawk a ni.
Miley Cyrus album thar ‘Endless Summer Vacation’ chu copy 1,19,000 hralhin No.3-ah a debut a, a album he chart-a top 10 kai thei 14-na (Disney Channel character Hannah Montana album chhiar telin) a ni. He album hi a hla hit ‘Flowers’ awmna kha niin, ‘Flowers’ hi Billboard Hot 100 (singles) chart-ah kar ruk chhung a No.1 nghe nghe a nih kha.
Chart top 10-a lang dang zawng chu he chart-a No.1 lo kai tawh vek an ni a, SZA ‘SOS’ chu copy 76,000 hralhin No.2 atangin No.4-ah a tawlh a, Karol G ‘Mañana Sera Bonito’ chu copy 52,000 hralh lehin No.3 atangin No.5-ah a tawlh a, Taylor Swift ‘Midnights’ chu copy 47,000 hralh lehin No.5 atangin No.6-ah a tawlh a, Morgan Wallen ‘Dangerous: The Double Album’ chu copy 39,000 hralh lehin No.6 atangin No.7-ah a tawlh a, Metro Boomin ‘Heroes & Villians’ chu copy 39,000 hralh lehin No.7 atangin No.8-ah a tawlh a, Bad Bunny ‘Un Verano Sin Ti’ chu copy 36,000 hralh lehin No.8 atangin No.9-ah a tawlh a, Drake & 21 Savage ‘Her Loss’ chu copy 34,000 hralh lehin No.10-ah bawk a la awm.

Exit mobile version