Travis Scott album ‘Utopia’ chu Billboard 200 (albums) chart-ah a No.1 a, he chart-a a zawna kar li a No.1-na a ni ta a, rap album zingah tun kum nga chhunga he chart-a a zawna kar li chin No.1 ni leh thei hmasa ber a ni. Hetihrual hian Hozier leh J-Hope te pawh top 10-ah an lang.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
Travis Scott ‘Utopia’ hi kar khat chhungin 1,61,000 hralh lehin, chung zinga 92,000 chu album tak tak hralhna niin, 69,000 chu streaming atanga album hralhna tlukpui (on-demand official stream maktaduai 92.07) niin, album-a hla mal hralhna erawh chhiar tham a ni lo.
Chart No.1 hlui Morgan Wallen ‘One Thing at a Time’ chu 91,000 hralhin No.2-ah bawk a la awm.
Hozier album thar ‘Unreal Unearth’ chu 62,000 hralhin No.3-ah a debut a, 39,000 chu album tak tak hralhna niin, streaming atangin 23,000 (on-demand official stream maktaduai 29.58) niin, album-a hla mal hralhna chu chhiar tham a ni lo. Hozier hian he chart top 5-a lang thei album pathum a nei tling ta a ni.
Barbie soundtrack chu 55,000 hralh lehin No.4-ah bawk a la awm a, chart No.1 hlui Taylor Swift ‘Midnights’ chu 53,000 hralh lehin No.6 atangin No.5 a kai thar leh ta bawk.
J-Hope album ‘Jack in the Box’ chu 50,000 hralh lehin No.6 a kai thar a, he album hi nikum July ni 15-a tlangzarh tawh kha niin, tun hi chart top 10-a a lan vawi khatna a ni. He album hi bonus track dah telin a CD-in a vawi khat nan August ni 19 khan an tlangzarh ta chauh a ni. Nikum lama an tlangzarh khan digital download album leh streaming chauhin an tichhuak a ni. J-Hope BTS member zinga solo artist anga Billboard 200 chart-a top 10 kai thei album nai thei pathumna a ni a, a bandmate RM leh Jimin te hnung a rawn zui ve ta a, RM hian nikum khan a album ‘Indigo’ chu No.3 a lo kai pui tawh a, Jimin pawhin kumtir lam khan ‘Face’ chu No.2 a lo kaipui tawh bawk a ni. BTS hian group angin chart top 10-a lang thei album pasarih an nei tawh a, chung zinga paruk chu No.1 an kai vek a ni.
Chart No.1 hlui Taylor Swift ‘Speak Now (Taylor’s Version)’ chu 48,000 hralh lehin No.5 atangin No.7-ah a tawlh a, Swift No.1 album hlui tho ‘Lover’ chu 46,000 hralh lehin No.7 atangin No.8-ah a tawlh a, Peso Pluma ‘Genesis’ chu 45,000 hralh lehin No.8 atangin No.9-ah a tawlh a, chart No.1 hlui Morgan Wallen ‘Dangerous: The Double Album’ chu 43,000 hralh lehin No.10-ah bawk a la awm.
Billboard 200-ah Travis Scott ‘Utopia’ a la No.1
