Billboard 200-ah Tyler, the Creator ‘CHROMAKOPIA’ a No.1
Tyler, the Creator album thar ‘CHROMAKOPIA’ chu Billboard 200 (albums) chart No.1-ah a debut a, Halsey leh Kelsea Ballerini te pawh top five-ah an debut a, Eminem pawh top 10-ah a rawng lang thar ve leh ta bawk.
‘CHROMAKOPIA’ hi Tyler, the Creator album he chart-a No.1 thei pathumna a ni a, a album dang ‘Call Me If You Get Lost’ (2021) leh ‘Igor’ (2019) te chu chart No.1 an lo kai tawh a, chart top 10-a lang thei album pasarih a nei tling ta bawk.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album a hla mal hralhna atanga album tlukpui te belhkhawm thin a ni.
CHROMAKOPIA hi kar khat chhungin US-ah 2,99,500 hralhin, chung zinga 1,57,000 chu streaming atanga album tlukpui (on-demand official stream maktaduai 212.55) a tling a, album tak tak hralh chu 1,42,000 niin, album-a hla mal hralhna atangin 500 a tling thei bawk.
Halsey album thar ‘The Great Impersonator’ chu 93,000 hralhin No.2-ah a debut a, chung zinga 81,000 chu album tak tak hralhna niin, streaming atangin 12,000 (on0demand stream maktaduai 16.05) a ni a, album-a hla mal hralhna erawh chhiar tham a ni lo. Halsey hian he chart top 10-a lang thei album panga a nei tling ta a, a album te hi top two-ah an lang thei vek a ni.
Chart No.1 hlui Sabrina Carpenter ‘Short n’ Sweet’ chu 74,000 hralh lehin No.2 atangin No.3-ah a tawlh ve thung.
Kelsea Ballerini album thar ‘Patterns’ chu 54,000 hralhin No.4-ah a debut a, a album he chart-a thleng sang ber a la ni a, top 10-a lang thei album pahnih a neihna a ni bawk.
Rod Wave album ‘Last Lap’ chu 51,000 hralh lehin No.4 atangin No.5-ah a tawlh a, chart No.1 hlui Eminem ‘The Death of Slim Shady (Coupe de Grace)’ chu 49,000 hralh lehin No.44 atangin No.6-ah a invawrh thar leh a. He album hi vinyl leh cassette an tlangzarh a, hei hian a hralh a tipung leh ta a ni.
Gracie Abrams ‘The Secret of Us’ chu 49,000 tling lo deuh hralh lehin No.8 atangin No.7-ah a insawn a, chart No.1 hlui Morgan Wallen ‘One Thing at a Time’ chu 46,000 hralh lehin No.6 atangin No.8-ah a tawlh a, Billie Eilish ‘Hit Me Hard and Soft’ chu 46,000 tling lo deuh hralh lehin No.9-ah bawk a la awm a, GloRilla ‘Glorious’ chu 45,000 hralh lehin No.7 atangin No.10-ah a tawlh ta bawk.
Billboard 200-ah Tyler, the Creator ‘CHROMAKOPIA’ a No.1
