Billboard Artist 100-ah Morgan Wallen a No.1
Morgan Wallen chu Billboard Artist 100 chart-ah a No.1 a, he chart-a a No.1 tawh zawng zawng belhkhawm chu kar kua a tling ta. Hetihrual hian TWICE leh Miley Cyrus te pawh No.2 leh No.3-ah an rawn lang thar ve leh ta bawk.
Billboard Artist 100 chart hi kar khat chhunga US-a zaithiam lar dan tehna niin, chart ranking siam nan hian kar khat chhunga album leh hla an hralh tam dan te, streaming leh radio airplay te chu tehna pawimawh a ni.
Morgan Wallen hian a album thar ‘One Thing at a Time’ leh he album-a hla te hralh that zar a la zo a, a album hi kar khat chhungin copy 2,59,000 hralh lehin Billboard 200 chart-ah a kar hnih nan a No.1 a, he album-a a hla 36 zinga hla 28 chu Billboard Hot 100 (singles) chart-ah an la lang bawk a (kar kalta kha chuan a hla 36 te hi Hot 100-ah an lang vek) hei hi Artist 100 chart-ah a No.1 pui leh ta a ni.
Morgan Wallen hi core country artist zinga he chart-a No.1 ni ngun ber niin, Jason Aldean leh Luke Combs ten kar thum ve ve No.1 tawhin an dawt a ni. A nawlpuia lakah chuan he chart-a No.1 ni ngun ber chu Taylor Swift niin kar 64 chhung a No.1 tawh a ni.
K-pop lam atangin TWICE chu No.2 a kai thar leh a, an group album thar ‘Ready To Be’ chu copy 1,53,000 hralhin Billboard 200 No.2-ah a debut a, hei hian Artist 100-ah pawh a vawrh sang ta a ni.
Miley Cyrus pawh No.8 atangin No.3-ah a insawn a, he chart-a a tawn sân ber a la ni. Miley pawh hian a album thar ‘Endless Summer Vacation’ hralh that zar a zo a, he album-a a hla ‘Flowers’ chu Hot 100-ah a No.1 thar leh ta bawk a, hei hian Artist 100 chart-ah a vawrh sang ta a ni.
Billboard Artist 100-ah Morgan Wallen a No.1
![](https://theaizawlpost.org/wp-content/uploads/2023/03/mor-1.jpg)