US Open champion Coco Gauff leh French Open winner Iga Swiatek-te chuan thla thara khelh tur women’s tennis hmanga international team competition lian Billie Jean King Cup finals an khel ve dawn lo tih an nemnghet a; he tournament hi Mexico rama hmeichhe tennis kumtawp kharna WTA Finals khelh zawh atanga a ni hnihnaa Spain rama khelh tan tur a ni.
Gauff ang bawka WTA Finals singles leh doubles khel tur world number four Jessica Pegula pawh United States team-ah a tel dawn lo.
Elena Rybakina of Kazakhstan leh Czech player pahnih Marketa Vondrousova leh Karolina Muchova-te erawh Billie Jean King Cup finals singles leh doubles-ah ram tan an inlan dawn thung.
Kumin September thla tir lam khan Mexico khawpui pakhat Cancun chu WTA Finals khelhna atan tihchian niin, chumi hma thla li la awmah khan Seville khuaa Billie Jean King Cup finals khelh a nih tur thu puan a lo ni tawh bawk.
Kum tawpa top eight singles player-te leh doubles team-te inelna WTA Finals dawl tur hian Saudi Arabia leh Czech Republic pawh an intlar a, Spain lamin an chang ta a ni.
Hetih lai hian team 12 intihsiakna tur Billie Jean King Cup finals hi November ni 7, Thawhlehniah Seville khuaa khelh tan tur niin, chumi hma lawk November ni 5, Pathianniah WTA Finals chu Cancun lamah an zo dawn a, Billie Jean King Cup lama inlan tura ngaih thenkhatin hun chep tak kara tlankual pumpelh zawngin ram tana an inlan loh tur thu an puang ta mek a ni.
Nikum Glasgow khuaa Billie Jean King Cup finals pawh kha Texas lama 2022 WTA Finals an khelh zawh atanga ni khat liam hnu leka an tan avangin Swiatek hian a khel lo tawh bawk a, kuminah pawh Poland tan Billie Jean King Cup finals a khel dawn lo.
Seville khaw tournament-ah hian Caroline Garcia leh Madison Keys bakah defending champions Switzer-land tana khel tur Belinda Bencic-te kan hmu thung dawn a ni.
Billie Jean King Cup khel lo tur Coco leh Swiatek
