Sawrkar hnathawkte pisa-a an luh hun leh an chhuah hun hriat zui theih nana biometric attendance ruahman chu department tinah a vil tur bik – nodal officer ruat an ni a, kar tin report theh lut tura tih a ni. Hei hi sawrkar hnathawk hotu lu ber chief secretary thuchhuak a ni.
He hmalakna hnuaiah hian tun dinhmunah MINECO-ah chuan cctv 70 leh biometric device 28 dah a ni tawh a, sawrkar department office hrang hrang ah dah belh zel tum a ni.
Mizoram sawrkar hnuaia department sawmli chuangah cctv leh biometric device hi dah vek a nih chuan, hemi atan hian sawrkar chu a insengso nasa dawn hle tihna a ni.
Tunhma zawng zawng pawh khan biometric device tel lovin kha leh chen kha office kan lo kai tawh a, tun ataka hetia han tih leh chiam hi eng nge kan hlawkpuina tur? tiin zawhna siam ni ta se, a chhanna chu a tam thei hle awm e.
Sawrkar hnathawk office kaite hi an inthlahdah a, a hun takah an kal lova, a hun takah an bang lova, hna pending a tam phah a, an hna a fel fai lo va, record vawn vel loh avangin RTI diltuten harsatna an tawh phah a, sawrkarin sum tam tak a seng reng bawk si a, mipui awlsamna tur leh sawrkar hmasawnna tura thawktute ni si hian, mipui harsatna an thlensak zawk a, hmasawnna aiin hnungtawlh zawkna a ni… tiin biometric device hman a nih chhan hi a pawmawm viau awm e.
Hetih lai hian, biometric device leh cctv bun a nih chhan hi ‘kal hun’ leh ‘haw hun’ dik vawn nan chauha kan hmang a nih a, file pending etc. a reh phah bawk si loh chuan, biometric device/cctv atana senso hi awmze nei lova insen thlawnna mai tur tihna a ni thei awm e. “Sawrkar hnathawkten hun an vawng dik ta hle mai…” kan tih rual hian, a lehlamah office hnain a fel phah leh si lo a nih chuan, hmasawnna thawk chhuak lo office smart tak hi kan ni vel mai mai ang tih a hlauhawm thei bawk awm e.
Eng pawh ni se, biometric device leh cctv atana senso nena inhen tur hmasawnna thar hmuh inbeisei chungin beiseina sang tak nen mipui cctv atangin i lo thlir phawt mai teh ang u.
Biometric attendance …
