Mizoram Science, Technology & Innovation Council (MISTIC) buatsaihin ‘Mapping out priority areas for the development of Biotechnology in Mizoram’ tih thupuia neiin, biotechnology hmanga Mizoram hmasawnna tur hrang hrang sawi ho a ni a. Mizoram sawrkar department Agriculture, Horticulture, AH& Vetry, Fisheries, Sericulture, Environment Forest & CC, National Health Mission, State Medicinal Plants Board Ayush, Krishi Vigyan Kendra Aizawl leh Mamit atang leh, zirna in – Department of Biotechnology Pachhunga University College, Department of Horticulture Aromatic and Medicinal Plants Mizoram University, College of Veterinary Science & Animal Husbandry, Zoram Medical College, ICFRE-Bamboo and Rattan Centre atangte in mithiam an tel a ni.
MISTIC member secretary, chief scientic officer Er H Lalsawmliana chuan Mizoram tana biotechnology pawimawh zia leh hmasawnna atana a tangkai theih dan tur a sawi a. MISTIC scientific officer Dr Lalchhandami Tochhawng chuan Mizoram tana biotechnology lama science & technology hmalakna leh, tun aia nasaa hma lak a ngaih zia a sawi.
Mizorama ram leilung hausakna (bioresource) lama harsatna neihte sawi a ni a. Mizoram tualto thlai chi hrang hrang, ramhmul damdawi, sa leh sangha humhalh leh tangkai zawka hman a nih theih dan tur sawi a ni. Ramhnuai (forest) humhalh a nih theih dan tur sawi ho a ni bawk.
Thlai chi tha zawk siamchhuahna atana tissue culture laboratory changtlung zawk, pa chi (mushroom spawn) tha zawk leh tam zawka siamchhuah leh, thlai chi lama intodelh kawnga chak zawka hma lak theih dan sawi a ni a. Hri inkaichhawn awlsam (infectious disease) leh inkaichhawn theih loh (non-infectious disease) natna tam tak laka kan him theihna tur leh sik leh sa inthlak danglam avanga natna awm thei zirchian leh a do kawnga hmalak dan tur pawh sawi a ni.
Biotechnology-a hmasawnna tur sawi
