BJP candidate a tlin chuan Dampa
hmasawnna hmu turin kal leh tiam
Union minister Kiren Rijiju chuan Dampa bial by election ah an party candidate an thlantlin phawt chuan an bial hmasawnna hmu turin amah ngei a hmuna kal leh a tiam.
Dampa bial by election atana BJP Mizoram campaign bul tanna chu Nilaini khan West Phailengah Union minister of Parliamentary Affairs & Minority Affairs Kiren Rijiju chuan a khuhhawng a. He inthlan atana BJP manifesto a tlangzarh.
India ramin zalenna a hmuh atanga kum 78-ah India sawrkarin minority minister turin, minority mi ngei a dah vawikhatna a ni tih Kiren Rijiju hian a sawi a. Congress hunlaiin hmarchhak mipui dahpawimawh kan ni ngai loa, Narendra Modi sawrkar hnuaiah erawh hmarchhak mite min dah pawimawh tih a sawi a ni.
Dampa bial hmasawnna atana BJP State president Dr K Beichhua thusawi, BJP official candidate Lalhmingthanga thusawi zawng zawng a taka tihlawhtling turin a hmunah a lokal tih sawiin, “Siaha district mipuiin BJP MLA pahnih an nei a, Siaha-ah development project tam tak kan pe. Chutiangin Dampa bial mipuiin development kan duh a nih chuan BJP candidate kan thlantlin a ngai,” a ti.
Dampa mipuiin an candidate an thlangtling a nih chuan Dampa bial hmasawnna hmu turin a hmunah ngei a lokal leh dawn tih Union Minority Affairs minister hian a sawi a ni.
BJP Mizoram president Dr K Beichhua pawhin, Delhi leh Dampa inthlunzawmna atan an candidate thlantlin a ngai tih a sawi a. Dampa bial mai ni lo, Mamit district chu India rama district hnufual zual thlan chhuah zingah a tel, tiin, “Delhi leh Dampa kan thlunzawm a nih chuan, development fund tam tak kan haichhuak thei dawn. A chhan chu, kan manifesto hi central hriatpui vek a nih vang a ni. Siaha leh Dehli thlunzawm a ni tawh a, hmasawnna project tam tak central-in min pe. Chutiang chiah chuan Delhi leh Dampa kan thlunzawm a ngai a ni,” a ti.
BJP candidate a tlin chuan Dampa hmasawnna hmu turin kal leh tiam
