Centra;-a BJP chhungah khi a tam a, tun term bak an daih a rinawm tawh loh tih All India Adivasi Congress thutkhawma tel Zodintluanga chuan a sawi.
All India Congress Committee (AICC) hnuaia All India Adivasi Congress National Executive member ni mek Zodintluanga hian New Delhi-a an thutkhawm chungchang hi Zirtawpni khan Congress Bhavan-ah a report a. New Delhi-a sumdawnna lama a thianthate chuan BJP an khi nasa lutuk ham tun term bak an daih an ring tawh lo tih an lo hrilh bakah Home minister Amit Shah leh Uttar Pradesh chief minister Yogi Adityanath inngeih loh ziate an sawi daih, tiin a sawi. An party mite sawi ai pawhin sumdawngte sawi chu an thlirna a rinngam hle zawk a ring tih a sawi.
“Rahul Gandhi inthlak nasat zia, a leadership hmasawn nasat zia an sawi a. Inthlan leh chu Congress sawrkar hun a ni mai, tih an sawi chu ka rawn hawn a ni,” a ti.
Indian National Congress chuan kum 50 chhung tribal-te an enkawl tha hle a, tunhnaiah hmanraw chi hrang hrang hmangin BJP-in an ‘vote bank’ hi an chhuhsak a. Hemi lalet leh tura ruahmanna siam chu an thutkhawm chhan ber a ni tih a sawi a. Tribal Regiment din leh International Day of the World’s Indigenous Peoples chu India-in pawm ve rawh se, tih an rel tih a sawi.
“Keini chuan ZORO kaltlangin UN-ah indigenous rights buaipuiin kan lut thuk tawh tih ka sawi a, a tih dan tur pawh an hriat duh angin report ka pe nghe nghe,” Zodintluanga hian a ti.
BJP chhungah khi a awm Congress-in hma sawn zel – Zodintluanga
