BJP-in an din champha lawm
Bharatiya Janata Party chuan April 6 khan India ram pumah an din champha vawi 43-na an hmang a. Mizoramah pawh an headquarters Aizawlah leh disrict hrang hrangah he hun hi an hmang.
BJP Mizoram Hqrs chuan zing dar 9.30 ah State president Vanlalhmuaka’n party flag pawtpharhin hun an hmang tan a. Prime minister Narendra Modi thuchah ngaihthlak a nih hnu ah BJP din champha lawmna leh hriatpuina atan Aizawl khawpui dungah two wheeler rally neih a ni a. District dang thenkhatah pawh two wheeler rally hi neih a ni.
Chawhnu hun an hmanah BJP Mizoram president chuan harsatna hrang hrang tawk chungin, India ram hmangaihna avangin kum 1980-ah Bharatiya Janata Party tih hming pu in an ding a. Vawiinah chuan India ram chu BJP sawrkar hnu atangin khawvelah ram hmasawn ber a ni thei ta tih a sawi.
Mizoramah BJP nih chu zahthlakah leh Kristian-te tana inhmeh lo anga ngai kan la awm chu thil nihna an hriat loh vang a ni tih sawiin, “Mizoram hian central puihna lo chuan din chhuahna chance kan nei lo tih, political party leader-te hi a hre chiangtu an ni. Party dangin an hlauh chu, Mizoramah BJP-in sawrkarna kan siam chuan, mipui sawrkar dik tak leh good governance dik tak mipuiin an hriat dawn avang leh, miretheite tan zalenna leh thawvenna a thlen dawn a, party dangin sawrkar leh na’n hun tha an nei tawh dawn lo tih an hriat avangin thudiklo hmangin mipui thinlung an kuai her ta a ni,” a ti.
BJP Foundation Day pual hian Social Justice Week April 14 thleng hman tur a ni a, week chhung hian kawng hrang hranga vantlang tana hnathawhna leh upate chawimawina hun hman a ni dawn tih an sawi.
BJP-in an din champha lawm
