Centra-a BJP sawrkar hotute chuan anmahni paihthla thei tura an ngaih political party leh politician-te an bei mek a. A bikin Kristian-te tan harsatna a siam chho mek tih Congress vice president Lalnunmawia Chuaungo chuan a sawi.
Kumin February 26 khan Assam Legislative Assembly chuan ‘The Assam Healing (Prevention of Evil) Practices Bill 2024’ a pass a. He dan hi hman a nih chuan ramthima rawngbawltuten tawngtaia tihdamna rawngbawlna an neih thin chu khap a ni tawh dawn tih MPCC hruaitu hian a sawi.
“Ramthima kan rawngbawltuten damlo an tawngtai damte, ramhuaiin a tihbuai an tihdamte chu he dan hmang hian hrem theih a ni dawn. Tihdamna rawngbawl nei thin Mission Field-a thawkte chu a vawi khatnaah kum thum thleng lung in tantir leh Rs. 50000 chawia hrem theih an ni anga, a vawi hnihnaah phei chuan kum 5 thleng lung in tan leh cheng nuai 1 chawitir theih an ni dawn,” a ti.
Kumin Lok Sabha inthlanah central-ah BJP a sawrkar leh a nih chuan, hetiang dan hi Assam mai niloin BJP leh a thurualpuite sawrkarna state dangah pawh an pass ve zel loang tih sawi theih loh, tiin, “BJP thil tum ber chu, India ram hi Hindu rama siam a ni a. Chuvangin Kristian-te hi hnawk min tihna lian tak an nei a. Harsatna pawh kawng tinrengin mi siamsak mek reng a ni,” a ti.
Central-a BJP sawrkar chuan Electoral Bond Scheme a tichhuak a. He scheme hmang hian cheng vaibelchhe 8250 chuang sum a dawng tawh niin Lalnunmawia Chuaungo hian a sawi. He scheme hi diklo takin BJP sawrkar hian hmangin, mimal leh company tam tak, Income Tax department leh Enforcement Directorate kaltlanga tihluihna (coercion) hmangin BJP tan sum an thawh tir thin a. Hetianga diklo taka an hman avang hian Supreme Court-ah khin a ni a. Supreme Court hian he scheme hi hnawl (quash) ta tih a sawi.
Lok Sabha inthlanah tlin leh ngei tumin hmanraw chitin reng hmangin BJP chuan tan a la a. Democracy kalphung pangngai piahlama hma la in CBI, Enforcement Directorate leh Income Tax department ho dikhlel taka hmanruaa hmangin, BJP paihthla thei tura an ngaih political party leh politician-te an bei mek tih a sawi.
“Indian National Congress (INC) hi Indian National Democratic Inclusive Alliance (INDIA) hruaitu leh opposition party lian ber a nih avangin leh, Lok Sabha inthlana BJP kawng daltu lian ber a nih avangin central-a BJP sawrkar hian hmanraw hrang hrangin a bei a. Chu’ng zinga pakhat chu Income Tax department leh Enforcement Directorate diklo taka hmanruaa hmang a, INC sum hnar chhutchah sak a ni,” MPCC vice president hian a ti a. Income tax kaihhnawihah, inthlan atana Congress party inbuatsaihna chu BJP sawrkar duhthusam angin nasa taka tih khaihlak mek a ni tih a sawi a ni.
BJP-in anmahni paihthla thei tura ngaih an bei mek – Lalnunmawia Chuaungo
