BJP-in bial 101-a an candidate puang kim ta

BJP-in bial 101-a an candidate puang kim ta
BJP chuan Nilaini zan khan a vawi thum nan Bihar assembly inthlana an candidate tur an puang leh a, thawh hnuhnung berah hian mi 18 hming puan niin an dinna tur bial 101-a an dintir turte an puang kim ta.
Bihar-ah hian NDA tangrualah BJP hi bial 101-ah ding tur niin an thawhpui party lian dang, Janata Dal-United chuan bial 101 bawk an chuh ang.
Nilaini chhuna khan BJP hian hming 12 an lo puang tawh bawk a. Thawhlehni khan a thawh hmasa berah mi 71 an lo puang tawh a, deputy chief minister pahnih, Samrat Choudhary leh Vijay Kumar Sinha te chu Tarapur leh Lakhisarai biala ding tura tih niin minister paruk an puang tel bawk.
Candidate 101 an puanah hian BJP hian an MLA tang lai 16 hming a lang tawh lo.
Hnam hla sa thiama lar, Maithili Thakur chu Alinagar bial, Darbhanga district-ah a ding ang.
NDA elpui ber, Tajeshwi Yadav-a kaihhruai Rashtriya Janata Dal (RJD) chuan an candidate turte an la puang lo va. An thawhpui, Congress pawhin official-a puan an la nei lo va, X-ah erawh hming thenkhat an pho chhuak tawh thung.
BJP thawhpui, Nitish Kumar-a kaihhruai JD(U) bakah hian Lok Janshakti Party (Ram Vilas) chuan bial 29-ah an chuh dawn a, anni hian an candidate tur thenkhat an puang tawh a. Hindustani Awam Morcha (Secular) chuan bial ruk an chuh tura ding turte an puang vek tawh bawk.
Nilaini zana BJP-in candidate tur an puanah hian Satish Kumar Yadav chu Raghopur bialah an dintir dawn a, he bial hi kum 2015 atanga Yadav-a bial a ni a. Prashant Kishor-a kaihhruai, Jan Suraaj Party pawhin bial chuh kim vek an tum a, Raghopur-ah hian Chanchal Singh an dintir dawn tih an puang tawh.
Raghopur hi Lalu Yadav chhungkaw lenna niin Tejashwi hma pawh hian Lalu leh a nupui, chief minister hlui, Rabri Devi ten an lo bial tawh bawk.
Bihar assembly-a bial 243 hi thawh hnihin, November 6 leh 11-ah inthlan tur a ni a, November 14-ah vote chhiar a ni ang.