BJP chuan MNF chauh a bei a, sawrkara tel ngei an tum thu an sawi bawk avangin ZPM nen puan an inzawm tih a chiang tih MNF party chuan an sawi.
MNF Media & Publicity general secretary VL Kroshnehzova chuan Manipur buainaa MNF-in Zofate thlavang a hauh avangte, ramngaw tichereu thei dan siamthatna a nih avanga Forest Conservation (Amendment) Bill 2023 an dodalnaah te, hnam hrang hrangin tihdan phung kan neih leh kan sakhua ngei dinhmun derthawnga siamtu tur Uniform Civil Code chu MNF-in a duh loh avangte, Myanmar leh Bangladesh buainaa Zohnahthlak raltlante NDA sawrkarin nawrlet vek tura Mizoram sawrkar hnena a tih an dodal avangte, BJP kaihhruai Assam sawrkar chu Mizoram sawrkarin huai taka a dolet avangte, Manipur Zofate thlavang hauhnaah Manipur chief minister, BJP rumrutin MNF paihthlak a duh avangte in NDA sawrkar chuan ZPM tungding turin nasa takin chet an lak ngei a rinawm tih a sawi.
“BJP hian an duh duhin MNF leh Mizoram sawrkar hi a ti thei lo tih an hriatchian tawh avangin MNF chu ralpui phiara phiarin na takin a bei ta a. Congress chu inthlanah eng ruai an ni dawn lo tih a hmuh avangin an bei lem lo. ZPM phei chu engtin mah an bei loa, sawisel zawngin tawng an cheh miah lo. Hei hian BJP leh ZPM hi puan an inzawn a, hnungthak an inhiahtawn tih a tichiang hle,” a ti.
ZPM hruaituten BJP nen an thawkho dawn lo nia an sawi angin, inthlan hma in langsar takin thawkho (pre-poll alliance) lo mah se, chanchinbumiten inthlan zawhah sawrkarna siam thei awm ta lo se, BJP an thawhpui angem, tia Pu Lalduhoma an zawhnaah inthlan hnulam chu hunin a hril ang, tih bakin a chhang duh lo tih MNF general secretary hian a sawi.
NDA-a MNF tel danah issue-based zela kalin, Mizoram tana tha lo an tih chuan a dodal mai tih a sawi a.”NDA-a MNF a tel chhan chu, anti-Congress alliance a nih vang a ni. BJP hruaitu lawkten na taka MNF an sawisel ta chiam chiam hian MNF dinhmun diktak a tarlang a. ZPM an sawichhe ve ngai miah lo hian BJP leh ZPM inkar chu buichhe laih lohin a puang mek zawk a ni,” a ti.
Party dangten MNF an sawiselna thin, Citizen Amendment Bill-ah Mizoram MP-in a thlawp zawnga vote a thlak chhan chu BJP leh a thurualpuiten an MP ngahna hmangin an pass tho dawn a. Mizoram leh hmarchhak state-ah hman a nih ve dawn loh thu tihchian a nih tak avang chauh a ni tih VL Kroshnehzova hian a sawi a. A ngai ang ang kha chuan vote hmangin a dodal ngei ang tih a sawi.
BJP-in keini chauh min bei ZPM an sawi chhe duh lo – MNF
