BJP-in manifesto a tihlawhtling thin – BJP president

BJP-in manifesto a
tihlawhtling thin
– BJP president
BJP chuan a tihhlawhtlin theih tur chiah manifesto-ah a dah thin a, state-a an party-in manifesto a siam chu central-a sawrkar lai BJP pawmpuina lak thlap a nih bawk avangin AMC inthlanpuia an manifesto chu Aizawl khawpui tidanglam dawrh thei tur a ni tih an party president Dr K Beichhua chuan a sawi.
Ningania Aizawl Municipal Corporation General Election 2026 atana BJP Mizoram manifesto a tlangzarhnaah State president Dr K Beichhua, MLA chuan, Mizo politician hmasatea manifesto chu inziahthat siak mai mai, tih tawngkam a awm thin chu a tha lo hle tih sawiin, “Politics hi inbumna ang maia kan chhuah thin hi a pawi a. Tunlai thalaite chu an changkang tawh em em a, kan kutah hian khawvel thil kan hre thei vek tawh. Chuvangin BJP Mizoram chuan kan manifesto hmang hian Aizawl khawpui tan hma kan la dawn a ni,” a ti. Manifesto chu BJP chuan an siam satliah ngai loa, an tih theih tur ngei an dah thin mai ni loin, central-a an hotuten an pawmpui sak thlap a nih avangin an manifesto reng reng chu an tihhlawhtlin theih zel a ni tih a sawi.
An manifesto-a pawimawh deuh zingah, bawlhhlawh paihna leh sawngbawlna hmun thar siam, bawlhhlawh paihna tur hmun thar siam, Swachh Bharat Mission kaltlanga hmalak theih awm apiangah hma lak an tum bakah Clean Aizawl app an siam anga, chumi hmang chuan bawlhhlawh paih chungchang report siamna tur a awm dawn a, awlsam takin hma a lak theih phah dawn tih a sawi. AMC huamchhunga plastic kan paih ho sawngbawlna hmun – recycle industry tha tak siam a ni anga, hei hian kawng tam takin bawlhhlawh a ti tlem dawn tih a sawi a ni.
AMC huamchhunga tourism lama hmalakna turin PM scheme kaltlanga homestay din duh tanpui, Chite lui chu khualzinte tlawh chakawm tur khawpa cheithat, PRASHAD scheme atanga Mizo hnam rohlu behchhana tourist hip thei tura siam leh, Aizawl kawng tih zauhna atan tuiluankawr khuhna lirthei rah ngam tura tha taka siam, puipunna hmun pawimawha free WiFi dah, AMC huamchhungah ‘slum area’ awm lo tura siam, thalaite tan Educational Fest leh Job Fest siamsak, sawrkar laipui tha chakna hmanga “Orange Economy” zulzuia eizawnna siamsak chu a tlangpui a ni tih a sawi bawk.
“Heng ringawt pawh hian Aizawl khawpui hmelhmang leh eizawnna thlenga a nghawng theih dawn avangin, AMC inthlana BJP manifesto hi Aizawl mipuiin min zirchian sak a, khawpui nuam leh changkang zawk kan din theihnan BJP candidate-te vote turin ka dil a ni,” a ti.