Centre-a BJP sawrkar chuan Mizoramah ZPM-in sawrkarna a chan theih nan leh an thawhpui ngei theih nan tum dang aia hmaah inthlan hun a puang niin Congress party chuan an sawi.
MPCC thupuangtu Ronald Sapa Tlau chuan ZPM leader boruak a hniam zual tih sawiin, centre-a BJP sawrkar chuan an hnawl tak MNF hniam zual lai tak leh Congress tho leh mek sawpchhiat nan inthlan hun an puang hma nia a ngaih thu a sawi. ZPM puih tlak an nih lai ngeia rik phut an duh vang a ni, tiin, Pu Lalduhoma phone call leakout atangin an thawk dun ngei dawn tih a chian thu a sawi a ni.
Election Commission of India chuan MNF sawrkar SEDP a vuiliam tawh tih sawiin, harsat luat vanga MNF thlemna sala tangte tan zalenna dar a ri tih a sawi. Rethei leh mangang dinchhuah duh tan Congress president-in kawngkapui zau takin a hawng tih a sawi. Congress party chuan an manifesto an tihlawhtling ngei thin nia sawiin, an manifesto chu an puan chhuah tep tawh thu a sawi a. Party mala sawrkarna an siam theih dawn leh dawn loh an la inbuk ve mek tih a sawi bawk.Party tinin MLA candidate duhawm tak tak an neih rualin, a pawimawh ber leh lu ber chu chief minister a ni lo thei lo thin tih Ronald Sapa Tlau hian a sawi a. Thutiama ding ngailo CM leh party hrang hranga zuanglawr tawh leh rin ngam loh tur CM nge, sulhnu mam leh chhuanawm nei, thil tha leh dika huai taka hma la thin CM atan kan rin zawk dawn tih ngaihtuah turin mipui a ngen tih a sawi.
MNF leh ZPM boruak chu tunhnaiah a hniam chho mek niin MPCC thupuangtu hian a sawi a. Party dang pahnihten an mupui an kah zawh tawh laiin an party chuan mupui pahnih kahchhuah tur an la neih avangin Congress tan kawl a eng hle tih a sawi a ni.
BJP-in ZPM thawhpui duh vangin inthlan hun ti hma – MPCC
