BJP leh Kristianna inmil lo anga sawi chu insawithaihna mai a ni tih Union minister Kiren Rijiju chuan a sawi a. BJP sawrkar mah se, sawrkar kaihruaitu tur chu Mizo pa, Kristian pa tho a nih dawn avangin mahni hnam leh sakhua dodalin ro a rel dawn lo tih a sawi.
Thawhlehnia Aizawla thuthar thehdarhtute a kawmnaah BJP hruaitu, Union minister for Earth Sciences Kiren Rijiju chuan he thu hi chanchinbumite zawhna chhangin a sawi a. India hmarchhak, a bikin Kristian tamnaah pawh BJP kaihhruai sawrkar a ding a, harsatna an tawk em tih zirchiang turin Mizo mipui a sawm tih a sawi.
India danpuia Article 370 thiah leh Article 371 pawh sawinghin mai theih anga sawi awm thin pawh Congress-in hmarchhak leh Mizoram mipui bum an tumna mai mai niin Kiren Rijiju hian a sawi a. Union Home minister-in chiang taka a sawi tawh angin, Article 370 hi Jammu & Kashmir leh India ram hmun dang zawng daidanna a nih vanga thiah a ni a. 371 hnuaia awmte chu chu’ng hnam kalphung leh nundan, anmahni humhimna tur zawk, paih loa awmze nei zawka siam ngai a ni tih a lo sawi tawh thu a sawi a ni.
BJP-in Mizoram hmasawnna tura ruahmanna a nei tha ber a, BJP chu a thutiam tihlawhtling zel awmchhun a ni bawk tih BJP hruaitu hian a sawi. Centre-a sawrkar ringawt niloin, state-a an sawrkar tel a ngai tih sawiin, “Centre chuan ram a neih loh avangin state sawrkarin ram a pek bakah a lo tih ve tur a awm a, central-a sawrkar bakah state-a sawrkar loh chuan heng hmasawnna atana ruahmanna hi a taka tihpuitlin a har phah thin,” a ti. Hei hi Mizoram hmasawnna atan a taka tihlawhtling turin sawrkara an tel a tul tih a sawi.
Congress-in kum 60 chhung rorelna a chan chhungin, hmarchhak state leh hmarchhak mite, tribal-te a dahhniamin, a ngaihsak lo tih BJP hruaitu hian a sawi a. BJP-in Prime minister Modi kaihhruaina hnuaia sawrkarna a chan hnu ah hei hi inthlak hlawkin, tribal leh hmarchhakte a ngaihsak a, Delhi Police-ah hmarchhak mite buaipui tur Cell hran siamin, tunah chuan harsatna tawkte an buaipui zung zung tawh tih a sawi. India tana zalenna sualtu tribal-te pawh PM Modi hnuaiah hriat leh chawimawi an hlawh ve chauh niin a sawi bawk.
BJP sawrkar mah se, a kaihruai tur chu Kristian pa tho – Rijiju
