Congress leader Rahul Gandhi chuan Karnataka inthlana Congress chak hnuah BJP te chu Telangana leh state dang inthlanna neih hunah tihtetin an awm zel dawn a ti a. Congress party chauh ni lo, India mipuite chuan huatnaa khat BJP te ideology chu an hneh dawn tiin a sawi.
“Karnataka-ah BJP te tihtet theih an ni tih kan lantir tawh a, kan hneh a ni mai lo, kan tawmte tir a. Karnataka-ah kan phihthla a ni,” tiin Gandhi chuan a Indian Overseas Congress-USA tena dinner event an huaihawtnaah a sawi a.
Gandhi hian a hmain Washington leh San Francisco te a tlawh tawh hnuah New York a tlawh leh a, Pathianni khan Manhattan a Javits Centre-a community rally neihnaah thu a sawi a ni.
Karnataka inthlanah BJP te chuan engkim tih loh an nei lo ‘engkim mai an hmang vek a, media an thunun vek a, kan sum neih let 10 an nei a, sorkar lai an ni a, agency an thunun bawk a. Engkim nei chung khan kan nawr liam tho a ni’ tiin Gandhi chuan a sawi bawk a.
“Lo hria ula ka duh chu inthlanna awm leh tur Telangana-ah kan nawr liam leh dawn a ni” tiin a sawi bawk a. “Inthlan a zawh meuh chuan Telangana-ah BJP te hmuh tur an vang tawh ngawt ang,” tiin a sawi bawk a. Telangana-ah hian kumin kum tawpah inthlan a awm ang.
Community event-ah hian Congress thlawptu te, officials, party member leh Indian community te chu an tel thahnem hle a, he event ah hian New York City Mayor Eric Adams pawh a inlan ve bawk.
Telangana inthlan mai bakah inthlan dang ‘Rajasthan, Madhya Pradesh leh Chhattisgarh te a awm dawn bawk a, Karnataka-a kan tih ang bawkin chet kan la ang’ tiin Rahul Gandhi chuan a sawi bawk.
“Congress party chauh BJP te hneh tur an ni lo, India mipuite an ni zawk a. Madhya Pradesh mipui te, Telangana mipui te, Rajasthan mipui te leh Chhattisgarh mipui ten BJP te an hneh dawn a ni,” tiin Gandhi chuan a sawi bawk.
A chhan a sawiah Gandhi chuan “India chuan society-a BJP tena huatna an thehdarh ang chuan kal zel ngaihna a awm lo tih an hria a ni,” tiin a sawi bawk a. Hei vang hian state inthlang turah BJP te hnehin an awm ang a, chumi hnuah kum 2024-ah hnehin an awm leh ang a ti bawk a.
Opposition te an inlungrual a, kan thawkho a, ideology inbeihna a ni. Kawngkhatah BJP te divisive ideology a awm a, huatna a khat an ni a. Lehlamah Congress party ideology duhawm leh ngainatawm a awm thung, tiin a sawi bawk a.
Karnataka-ah pawh BJP te chuan inthlanah inthendarh tira chaka thinrimna siama community te inhuattir tumin theihtawp an chhuah a ti a. “Prime Minister ngei pawh a sulsutu zingah a tel a. An hlawhtlng em?” tiin Gandhi chuan a sawi bawk a. Karnataka mipuite chuan inthlan chu thil man, unemployment leh eirukna lam zawngin an la ve thung a ti thung.
NYC mayor Adams pawhin thusawina neiin, “New York City hi New Delhi of America a ni” tiin a sawi a. “Indian community chu highly-educated, sumdawn thiam ber ber” tiin a sawi bawk a. America danglamna chu tia sawiin, “In awmna rama in awm mek laiin in lo chuahna ram theihnghilh suh u tih a ni,” tiin a sawi bawk a.
“Indian-Americans in ni a. America in pawm ang bawkin Indian in nihna kha theihnghilh suh u,” tiin NYC Mayor chuan a sawi bawk a. India chuan tun hma atang tawhin khawvel hnenah pek tam tak a nei a ni a ti bawk a.
“Nobel peace prize dawngtu ropui tak tak te chuan in history leh society hausa tak atangin an puk thin a ni,” tia sawiin ancient Vedas leh tun hma thuziak te chu inspiration neih nan an hmang a ti bawk a.
A hmain Gandhi hian Roosevelt House-ah thinkers larte nena inkawmhona an nei bawk a. Gandhi chuan US-a Indian te chu ‘kan ambassador te in ni’ tia sawiin America leh khawvel dang te chu ‘Indian nihna leh awmzia inhrilh’ tiin Rahul Gandhi chuan a sawi bawk.
BJP te paihthlakin an awm dawn : Rahul
