BJP tel lo sawrkar a piang dawn lo
– MBJP president
Kumina Mizorama MLA inthlanah BJP tel loin sawrkar a piang dawn lo tih BJP Mizoram president Vanlalhmuaka chuan a sawi.
Mizorama kawng hrang hranga development kan hmuh mek chu BJP Mizoram hruaituten central-a an thlen avanga hma an lak a awm ta nual tih BJP State president hian sawiin, “Chu’ng zinga pakhat chu MNF sawrkar hmasa in an duh loh four lane Silchar to Aizawl kal tur hi a ni a, compensation leh sawrkar chak tawk loh vangin tun thlenga hnathawh hleihtheih loha a awm hi a pawi hle,” a ti.
Mizoramah central BJP sawrkar zar zoin kan nitin mamawh a thlawnin buhfai, gas connection, tui connection, inthiarna tha tak siamna tur te chu a bikin thingtlanga cheng miretheiten kan dawng chu a lawmawm hle laiin, Mizoram sawrkar hmalakna emaw ti kan la awm fo tih a sawi bawk.
“BJP chuan Mizoram hmakhua kan thlir a, party dang anga vehthlem kuala mipui rilru, an thluak suk sak mai mai hi kan tum a ni loa, Mizoram tan development tak tak thlentir hi kan tum a nih avangin sawrkarna kan chan hma pawhin Mizoram tan hma kan la a. 2023 MLA general election-ah BJP telloin sawrkar a piang dawn loa, BJP sawrkar kan neih hunah Mizoram chuan state dangten development an neih ang, ralkhata kan thlir thin chu a takin kan hmu ve dawn a ni,” a ti.
PMGSY kaltlanga thingtlang khuaten inkalpawhna tha kan neihna tur chu Mizoram sawrkar chuan an pawngsual zel avangin vawiin tlengin kawngpui tha kan nei hleithei loa, central-in sum min pek vek tawh Mizoram sawrkarin contractor bill an hrensak thin vangin PMGSY kawng chu a nih tur anga zawh theih a ni lo tih a sawi bawk.
BJP Mizoram president Vanlalhmuaka hian Mamit district-a thli leh ruah leh rial tla in an chenna in a tih chhiat vangin Lallen VC hnenah Rs. 15000, Kawnmawi VC hnenah Rs. 10000, Chhippui VC hnenah Rs. 10000 a pe a ni.
BJP tel lo sawrkar a piang dawn lo – MBJP president
