Kum 2024 Lok Sabha inthlan tawpna ber leh thawhsarihna chauh a awm tawh tihah Prime Minister Narendra Modi chuan May 28 khan BJP-te chuan chiang takin chakna an chan tur thu a sawi.
West Bengal a Lok Sabha inthlan chu ‘one-sided’ a ni a, Trinamool Congress leader te an ‘mangang’ tiin a sawi.
ANI tena an kawmnaah PM Modi chuan kum 2024 Lok Sabha poll-a West Bengal-a an party dinhmun tur sawiim seat tam ber an lak tur thu a sawi a.
“Bengal inthlanah hian TMC te hian an dam khawchhuah theih nan an bei a ni. Assembly election hnuhnung berah khan seat thum kan la a. Bengal mipui te chuan pathum aTangin 80-ah min hlangkai a, Lok Sabha inthlan hnuhnung berah khan nasa takin hma kan sawn a ni. Tun Tumah hian best-performing state chu West Bengal a ni ang a. West Bengal ah BJP ten seat tam ber kan la ang” tiin a sawi.
Kum 2019 Lok Sabha inthlanah khan BJP te chuan TMC te chaknaah nasa taka hmasawnna neiin seat 18 lai an la a, ruling party TMC te chuan seat 22 an la thung.
Prime Minister chuan West Bengal a kum 2024 Lok Sabha inthlan chu pakhat chauh chakna tur tia sawiin mipui ten BJP an thlawp tih an hriat avangin Trinamool Congress sorkar chu an phili mangang a ni a ti bawk.
“Tualthahna leh inbeihna a thleng reng a. BJP worker-te chu inthlan hmain lung in-ah khungin an awm a. Nghaisakna nasa tak an kalpui chungin mipui tam tak ten vote thlak turin ke an penchhuak tho” tiin PM Modi chuan a sawi bawk.
PM Modi chuan Trinamool Congress-te chu Calcutta High Court in kum 2010 hnulama OBC certificate pekchhuah vek a cancelled vek chungchangah a bei bawk a. Congress te pawh beiin Constitution khap kalpuiin religious-based reservation kalpuiah a puh bawk.
Mamata Banerjee in OBC certificate chungchanga High Court thutlukna sawisela a pawm loh tur thu a sawi chu ‘judiciary beihna a ni’ a tihsak bawk a.
“A hmasa berah minority te hnena pek sual kalpuiin Andhra Pradesh ah dan an siam phawt a, mahse Supreme Court leh high Court chuan Constitution-in a khap tiin an hnawl sak a. Fing takin hnunglam aTangin chetla lehin Muslim caste tinte chu OBC ah dahin OBC te right an chhuhsak a ni. High Court in thutlukna a siam khan an mi bumna turu tak kalpui chu lailanin a awm ta a ni. An vote bank politics kalpui aia vanduaithlak la thleng leh chu judiciary an namnul zui a ni. Court in eng pawhin ti se kan zawm dawn chuang lo an ti zui a nia. Heng thil hi engti kawng pawha pawm theih loh a ni” tiin a sawi.
Lok Sabha inthlan thawh rukna chu a tawp tawh a, a hnuhnung ber leh thawh sarihna chu June 1 hian constituency 57 ah neih a ni dawn a, June 4 ah result puan a ni ang a. Tun inthlanah hian BJP leh INDIA bloc chu inbei ber an ni.
BJP ten chiang takin chakna chang ang ti
![](https://theaizawlpost.org/wp-content/uploads/Clipboard01-1148.jpg)